E ka ndryshuar ODIHR-i deklaratën e djeshme?

ODIHR-i ka mbjellë sherr e konfuzion me deklaratën e vet kundër aplikimit të numërimit elektronik të votave. Ky konfuzion duket më i madh nëse ndjek një lajm të Shqipit të sotëm, me të cilin është hapur gazeta. “ODIHR-i nga Varshava: nuk jemi kundër numërimit elektornik”, është titulli që Shqipi ka zgjedhur për të hapur faqen e parë. Dhe në faqen 3 flitet për një bisedë që gazetarët e Shqipit kanë bërë me Thomas Rymer-in, zëdhënësin e ODIHR-it, të njëjtin person pra që një ditë më parë kish deklaruar (sipas të gjithë mass-medias shqiptare), se “numërimi elektornik në Shqipëri duhet të testohet e të futet në mënyrë graduale”. Në bisedën me Shqipin, Rymer-i e ka kafshuar pakëz gjuhën (me sa duket e kanë informuar mbi tollovinë  që ka provokuar në Tiranë). Ai fillon të përgjigjet duke thënë se “nuk jemi kundër numërimit elektronik”, dhe më pas shton se “numërimi elektronik duhet bërë i qartë, i vëmendshëm, i detajuar në ligj, dhe i përgatituir paraprakisht”. Duket se ky deklarim për Shqipin është krejt i ndryshëm nga ai i djeshmi; duket sikur praktikisht flet një njeri tjetër. Por po aty, Rymer-i thotë se “ky sistem duhet të testohet në kohën e duhur e në mënyrën e duhur”. Ç’dmth të testosh në kohën e në mënyrën e duhur? Mos vallë dmth ta fillosh me aplikim të pjesshëm në zgjedhjet e ardhshme, dmth me testim? Nëse po, atëherë i bie që s’kemi asgjë të re nga fronti i ODIHR-it.

Re.Pu.