Rudina Seseri ka ikur; por ‘i ka lënë një lodër’ në dorë maxhorancës

U bënë tre muaj që Rudina Seseri ka lënë mandatin e parlamentares. Do duhej të zëvendësohej, por ende nuk ka ndodhur. “Të enjten kur kjo çështje plasi, Jozefina Topalli lajmëroi se mbledhja e Këshillit të Mandateve e Rregullores do të mbahej sot, të hënën”, thotë Braçe, dhe kronika e ngjarjeve politike i jep të drejtë. Topalli premtoi se sot do të mblidhej ky këshill. “Sot nuk ndodhi. Kështu ka ndodhur dhe tre herë të tjera! Përtej procedurës, ky është një skandal i madh.”, denoncon deputeti socialist, një nga më të zëshmit në mjedisin e debatin politik. Dhe përfundon me tone dëshpëruese: “Është e kotë që flasim për zgjedhje të reja, të ndershme, të drejta e të barabarta, për lista elektronike, kontroll elektronik të kartave apo numërim elektronik! Këta po na vjedhin mandatin mú në mes të Tiranës, në Parlament dhe me dhunë. E kotë të flasim për reforma, mirëkuptim dhe konsensus pa u kthyer mandati. Menjëherë. Që nesër.”

Sipas socialistëve, Berisha e vonon zëvendësimin, ngaqë e ka mendjen tek votat në momentin presidencial. Por nuk duket se është kjo. Nuk ka gjasa që ta shtyjë edhe dy a tre muaj këtë punë. Ka shumë gjasa që ta bëjë thjesht për të provokuar. Provokimi është stil e mënyrë jetese i Berishës. Ndësa Topalli s’hyn në këtë mes. Topalli bën ç’i thonë.

E.G.