Putin merr mandatin e tretë presidencial; dhe ngashërehet

Vladimir Putin do të jetë President i Federatës Ruse për herë të tretë. Ai ka fituar zgjedhjet e së dielës me 63, 75% të votave. Ai e ka pritur i ngashëryer e me lolë këtë fitore të tijën, s’ka gjë se opozita është duke ngritur zërin  për manipulime. “Është një rezultat i trukuar”, po thonë organizata jo qeveritare ruse. “Është një garë që është kontrolluar nga kandidati Putin”, thonë vëzhgues të OSBE-së. Sipas gazetave ruse që anojnë nga opozita, “pushteti nuk ka mundur që të rrisë legjimitetin e vet pas këtyre zgjedhjeve”.
Në fakt, opozita po bëhet gati të organizojë protesta, por fitorja në fjalë, edhe sikur të korrektohet me një koeficient manipulimi, mbetet një rezultat i mirë për Vladimir Putinin, e asfiksues për opozitën. Kjo e fundit po rrit ndikimin në Moskë (edhe rezultatet zyrtare thonë se Putini nuk arriti ta kalonte 50%-ëshin në kryeqytet), por shifra 63.75% në favor të Putinit në planin nacional është disi shkurajuese për opozitën.

Re.Pu.