Pse ka dështuar ideja europiane sipas Martin Feldstein-it?

Martin Feldstein nuk është një njeri dosido. Ai mbahet si një nga ekonomistët më të mirë në botë; ish-këshilltar i Presidentit Reagan dhe aktualisht profesor i Ekonomisë në Universitetin e Harvardit. Në një shkrim të fundit Feldstein ka shpjeguar tri arsye se pse Unioni Europian, dhe sidomos krahu monetar i tij, nuk kanë funksionuar e nuk ka gjasa të funksionojnë. Për të bërë këtë ai ka krahasuar Shtetet e Bashkuara të Amerikës me idenë e Shteteve të Bashkuara të Europës. Sipas ekonomistit të Harvardit, ndryshimi mes të dyjave dhe suksesi i Amerikës qëndron në atë se Amerika është në mënyrë efektive një treg unik pune me punëtorë që lëvizin nga zona me papunësi të lartë apo në rritje, drejt vendesh ku punët vijnë më në shumicë. Në Europë tregjet kombëtare të punës janë efektivisht të ndara nga kufijtë e gjuhës, kulturës, fesë, anëtarësisë në sindikata dhe sistemet e sigurimeve shoqërore. Një ndryshim i dytë sipas Feldstein-it është një sistem fiskal i centralizuar që Amerika e ka, ndërsa Europa jo. Ndryshimi i tretë, vazhdon argumenti i Feldstein, ka të bëjë me balancimin e buxheteve operacionale vjetore që shtetet e Amerikës janë të detyruara të bëjnë, kushtëzuar nga kushtetutat e tyre. Gjë që nuk ndodh në Europë.

H.B.