Ligji i verifikimit të pasurisë së zyrtarëve inkurajon çdo kusarí të mundshme

Kreu i Inspektoriatit të Lartë të Deklarimit dhe Kontrollit të Pasurive, Adriatik Lalla, ka dhënë një intervistë për Top-channeli-in, në të cilën “ngre një padi” ndaj sistemit të drejtësisë, përfshirë prokurorinë. Sipas tij, denoncimet apo raportimet e institucionit të tij humbasin pa nam e nishan në dosjet e burokracisë së sistemit. "Kjo ka sjellë krijimin e një manteli paprekshmërie tek zyrtarët e korruptuar, duke bërë që ata të ndihen mbi ligjin, mbi qytetarët e thjeshtë", thotë ai. Në fakt, numërohen me gishtat e dorës zyrtarët e denoncuar nga ILDKP-ja dhe të dënuar nga gjykatat; për më tepër, ‘kurbanë’ janë bërë zyrtarë të parëndësishëm të provincës.

Përveç sa më sipër, ai nënvizon një dukuri, e cila e nxjerr në një dritë qesharake të gjithë retorikën kundër korrupsionit. Është fjala për "faktin se zyrtarë të korruptuar, pasurinë e tyre e fshehin në emër të personave të afërm që lidhen me ta. Dhe problemi është që nuk ka detyrim ligjor, që këta persona të lidhur me zyrtarët të bëjnë deklarim të pasurisë”, saktëson ai. Por kopertura me kushërinj nuk mbaron këtu. Një masë e madhe zyrtarësh e justifikojnë pasurinë e tyre me "dhuratat në lekë e në valutë që ata marrin prej të afërmëve”. Dhe kështu i bie që për çdo pasuri të pambuluar me të ardhurat legale është mjaft të thuash që e ke dhuratë prej x-it apo y-it, dhe je në rregull. Ligji pra e quan normale këtë situatë. Kësaj i thonë të bësh një ligj me synimin për të përligjur çdo kusari të mundshme.

Re.Pu.