Financat kujtohen të sqarojnë publikun vetëm katër javë nga skadimi afatit të ligjit të faljes

Ministria e Financave ka nxjerrë sëfundmi një broshurë, në të cilën udhëzon qytetarët dhe bizneset se si mund të përfitojnë nga ligji për faljen fiskale që zbatohet nga korriku 2011. Broshura vjen tani, pas shtatë muajsh, në një kohë kur vetë ministri i Financave, Ridvan Bode do të deklaronte në fund të vitit të shkuar se falja nuk kishte dhënë rezultatet e duhura pikërisht për shkak se qytetarët nuk e kishin kuptuar mirë atë.

Në fakt ka të drejtë, përveç lajmeve në media dhe konferencave për shtyp nga zyrtarë të ndryshëm të ministrisë së Financave, procedurat se si funksionon ligji i faljes fiskale apo përfitimet e qytetarëve nuk janë shpjeguar asnjëherë nga fillimi deri në fund me angazhimin e vetë institucionit përgjegjës. Me publikimin e broshurës dje në mbrëmje (dërguar me e-mail gazetarëve) Ministria e Financave duket se kërkon të rregullojë atë ç’ka nuk bëri për shtatë muaj me radhë. Broshura e sqarimit, është nxjerrë fiks katër javë para skadimit të afatit të ligjit të faljes. Mbetet për t’u parë ndikimi i kësaj nisme tani.

S.E.