E di Carrefour-i që ka ardhur në Shqipëri? Në site-in e vet nuk ekziston një lajm i tillë

Njoftimi se Carrefour-i francez (marka e një zinxhiri të famshëm hipermarketesh) do të vinte në Shqipëri, dhe do të merrte hapësira të bollshme në qëndrën tregtare të njohur me emrin TEG, që u përurua pak ditë më parë me pjesëmarrjen inkurajuese të gjithë establishmentit sundues të vendit, ka dalë muaj më parë. Dhe duhet thënë se ka qenë një lajm i bukur, pasi Carrefour-i është Carrefour, nuk është shaka (sa për të krijuar një ide, në këtë zinxhir hipermarketesh të shpërndarë në të gjithë botën janë punësuar afro gjysmë milioni vetë). Nuk ka pasur vend për dyshime në këtë mes, pasi vetë shefi egzekutiv i Carrefour-it është takuar në muajt e verës me shefin e egzekutivit shqiptar, Sali Berisha, dhe në atë takim është rënë dakord. Por edhe për ndonjë që ka pasur dyshime, më në fund erdhi dita e përurimit, dhe u bindëm të gjithë se lajmi ishte i vërtetë. Carrefour-i ka marrë disa mijra metra katrorë në qëndrën TEG.

Mirëpo dikush nga Shqipëria, o pronari i TEG-ut, o vetë kryeministri Berisha, do duhet t’i bëjë një telefon shefit egzekutiv të kësaj kompanie, dhe t’i thotë që këtë lajm ta nxjerrin në site-in e kompanisë. Nuk kuptohet pse e kanë lënë pas dore, apo pse kanë harruar ta bëjnë, pasi investimi është shumë serioz. Për më tepër, Shqipëria është i vetmi vend në rajon, ku ka ardhur Carrefour-i (siç është thënë nga disa media të Tiranës). Pse dreqin nuk e fusin si lajm në rubrikën informative të website-it www.carrefour.com?

Re.Pu.