Berisha bën tollovi shifrash në Munih

Kryeministri Berisha ka thënë në Munih, se “Shqipëria në katër vitet e fundit, të marra së bashku, ka pasur një rritje ekonomike prej 18 përqind, rritje në distancë më të lartën në Evropë. Ky model ka nevojë të përsoset më tej”. Së pari nuk kuptohet mirë se pse i merr të katër vitet së bashku. S’ishte parë ndonjëherë që një kryeministër, për të treguar se vendi nën qeverisjen e tij ka rritje, të bëjë mbledhje aritmetike të rritjeve vjetore. Së dyti, është interesante të verifikohet saktësia e shifrës. Në vitin 2011, rritja ishte 0,5%; dhe kështu që praktikisht i bie që rritja prej 18% të ketë qenë në tri vitet e tjera, dmth 2010, 2009 e 2008 të marra së bashku. Është kështu? Është veç në kokën e tij.

Ed Zaloshnja, me të marrë vesh këtë xhevahir të kryeministrit, kish bërë një tweet në respublica.al, ku shfaqej i shock-uar. Pak përpara tij, shefi i socialistëve, Rama kish bërë disa mesazhe njëri pas tjetrit, po në twitter. Në të parin vetëm konstatonte, duke e lënë lexuesin ta përtypte vetë tekstin: “Flet në mes të Gjermanisë për rritje me 18% të GDP-së”. Në tjetrin thosh, se “këto shfaqje brutale të marrëzisë në pushtet janë alarm për ndryshimin e domosdoshëm”. E në të tretin zhvillonte të njëjtin mesazh me fjalë të tjera: “kryeministri vijon të bëjë qesharak vendin tonë duke eksportuar edhe jashtë fjalimet e tij groteske për ekonominë”.

Ka të drejtë.

E.G.