Varfëria, 9% e shqiptarëve me ndihmë ekonomike

Mijëra familje shqiptare bukën e gojës e fitojnë nëpërmjet ndihmës ekonomike. Sipas të dhënave nga Shërbimi Social Shtetëror rreth 9% e familjeve në rang vendi trajtohen me ndihmë ekonomike. Ndërkohë që zonat me varfërinë më të lartë janë veriu dhe verilindja e Shqipërisë. Në këto zona ndodhet dhe përqindja më e madhe e familjeve që trajtohen me ndihmë ekonomike nga shteti. Në krye të listës renditen rrethe si Kukësi, Shkodra dhe Lezha. Sipas drejtorit të pagesave në kesh pranë Shërbimit Social, Leonard Strazimiri, edhe këtë vit kanë vijuar spastrimet e listës nga abuzuesit. Gjatë 9 muajve të parë të këtij viti janë larguar nga skema rreth 2500 familje që përfitonin pagesën e ndihmës ekonomike pa të drejtë. 

VARFËRIA 
Varfëria është ulur këmbëkryq në veriun e Shqipërisë. Në shumë rrethe gati gjysma e familjeve trajtohen me ndihmë eko-nomike, pasi nuk kanë të ardhura të tjera. Drejtori i pagesave në kesh pranë Shërbimit Social ka bërë të ditur se rreth 9 për qind e familjeve në rang vendi trajtohen me ndihmë eko-nomike. "Numri më i madh i familjeve që trajtohen në skemën e ndihmës eko-nomike është i përqendruar në zonat veriore dhe verilindore të vendit, ku shpërndahet dhe masa më e madhe e fondeve të akorduara për këtë program. Mund të themi se nga 1.145.918 familje në rang njësish administrative, në shkallë vendi, 99 142 prej tyre janë trajtuar në skemën e ndihmës eko-nomike në gjashtë mujorin e parë në skemën e ndihmës ekonomike, ose e shprehur në përqindje rreth 8.64% e familjeve në shkalle vendi trajtohen në këtë skemë",-ka sqaruar Strazimiri. Ndihmë të plotë marrin përafërsisht 32 mijë familje, ndërsa të pjesshme rreth 67 mijë. 

ABUZIMET 
Një problematikë, e cila është ngritur disa herë nga Shërbimi Social Shtetëror, është përfitimi i ndihmës ekonomike pa të drejtë nga disa familje të cilat trajtohen nga këshillat e bashkive dhe komunave. Gjatë nëntë-mujorit të parë të vitit 2012 skema e ndihmës ekonomike u spastrua nga mijëra familje që trajtoheshin pa të drejtë. "Për periudhën janar-shtator 2012-të janë kontrolluar 213 njësi të qeverisjes vendore. Nga këto kontrolle janë konstatuar rreth 2480 raste me një efekt financiar 7.418.000 lekë, ku familjet në skemën e ndihmës ekonomike e përfitonin në mënyrë abuzive dhe jashtë kritereve këtë pagesë, gjithashtu janë konstatuar dhe 345 raste si pagesa të padrejta të pagesës së personave me aftësi të kufizuar, me një efekt financiar rreth 4.8 milionë lekës",-ka deklaruar drejtori i pagesave në SHSSH Strazimiri. Sipas tij masa ndëshkuese janë marrë edhe për personat për-gjegjës. "Janë propozuar gjithsej 47 masa administrative të ndara këto në 29 vërejtje me paralajmërim për largim nga detyra, 7 largime nga detyra dhe 11 gjoba me nga një dhe dy paga për personat përgjegjës", - sqaron drejtori i pagesave në kesh. 

Ermelinda Hoxhaj

Gazeta Shqiptare