Talasemikët, 150 efektivë të Policisë Ushtarake dhurojnë gjak.

Për të dytën ditë radhazi, 150 punonjës të Policisë Ushtarake kanë dhuruar gjak për t’i ardhur në ndihmë të sëmurëve talasemikë. Kërkesës së Kryqit të Kuq Shqiptar i janë përgjigjur efektivë të policisë ushtarake, oficerë, nënoficerë, ushtarë profesionistë dhe punonjës civilë të kësaj njësisë së Policisë Ushtarake duke dhuruar gjak.
 
Sipas Ministrisë së Mbrojtjes, “Policia Ushtarake e ka bërë ritual të përhershëm dhurimin e gjakut për fëmijët në nevojë dhe ka kohë që i është bashkuar motos “Dhuro Gjak, Shpëto Jetë”. Dhe këtë vit Policia Ushtarake ishte i pari institucion që iu përgjigj kërkesës së Kryqit të Kuq, duke parë edhe periudhën e vështirë në të cilën ka qenë mjaft e vështirë furnizimi me gjak i fëmijëve në nevojë”.
 
“Policia Ushtarake, si pjesë e Forcave të Armatosura është në shërbim të atdheut dhe shtetasve te tij dhe në këtë kontekst dhurimi i gjakut është një nga mënyrat më fisnike dhe më humane me anë të së cilës ne përmbushim misionin tonë në kohë paqe”, thuhet më tej në njoftimin e Ministrisë së Mbrojtjes.