Sot buxheti, qeveria në Spanjë 39 miliard euro kursim

Qeveria spanjolle miraton sot buxhetin për vitin 2013, ku  përfshihen 39 miliardë euro shkurtime në shpenzime dhe ku parashikohen dhe rritje taksash. E ndërsa masa e reduktimeve buxhetore është shpallur që më herët, sot qeveria e Mariano Rahoit shpall hartën e këtyre shkurtimeve, detajet rreth reduktimeve në buxhet. 

Por me një ekonomi të rrudhur dhe trazira në vend, reduktimi i defiçitit përmes masave shtrënguese të mëtejshme mbetet detyrë të vështirë për qeverinë. Qeveria ka parashikuar një defiçit buxhetor këtë vit prej rreth 6.3%, por shumë analistë vlerësojnë se do të jetë më afër 7%.
 Masat vijnë në mesin e protestave në rritje dhe pritshmërisë se do të jetë rradha e ekonomisë së pestë në Europë, Spanjës, të kërkojë ndihmë financiare nga partnerët e saj në Eurozonën 17 anëtarëshe. 
 Spanja, borxhet e së cilës janë parë si kërcënim për stabilitetin e eurozonës, është vënë nën presion të madh për të kërkuar pako shpëtimi nga Banka Qendrore Evropiane. Por, një pako e tillë do të nënkuptonte masa të tjera shtrënguese për vendin e goditur tashmë nga recesioni dhe nga papunësia rekord në nivelin e 25 për qind.
 Mijëra protestues janë tubuar afër parlamentit në Madrid për të dytën natën rresht  për të protestuar kundër masave shtrënguese. Situata ekonomike mbetet e zymtë ndërsa paqartësitë spanjolle flasin për probleme më të thella për mbarë eurozonën. Albanian Screen