Shërbimi Civil, Meta: Kuvendi do vendosë. Asnjë nismë e arsyetuar nuk pengon integrimin në BE

TIRANË- Kreu i Kuvendit Ilir Meta ka deklaruar se akti normativ i qeverisë për shtyrjen e ligjit për shërbimin civil do të diskutohet dhe për te do të vendosë Kuvendi.
Ai ka ftuar palët të përfshihen në një debat aktiv e konstruktiv, duke shpresuar se do të mbërrihet në konsensus. Sipas Metës, asnjë nismë e arsyetuar dhe me qëllime pozitive nuk bëhet pengesë e as cenon rrugëtimin drejt integrimit të vendit në BE.
“Ligji eshte i rëndësishëm, por absolutisht parlamenti nuk anashkalohet, ky akt dje ka mbërritur në kuvend dhe do të diskutohet nga kuvendi dhe unë ftoj të gjithë të dialogojnë në mënyrë aktive e konstruktive se shërbimi civil i takon të gjithëve dhe cdo polarizim i debatit nuk ndihmon në konsolidimin e këtij shërbimi”- tha Meta.
Kryetari i Kuvendit eshte shprehur i bindur “se procesin e integrimin nuk e cenon asnjë nismë e arsyetuar në mënyrë të shëndetshme e me qëllime pozitive”.
Ai ka inkurajuar debatin aktiv edhe gjatë rrugës së procedurave që do ndjeke kuvendi për vlerësimin e aktit normativ.
“Besoj se në komisione dhe seancen plenare ku do të vendoset për të argumentet do të bëhen prezente nga qeveria dhe opozita dhe në fund shpresoj të ketë konsensus përsëri në këtë drejtim”- tha ai.

Panorama