Reklamë anti islam në metronë e Washington-it

Një gjykatës në Washington vendosi se autoritetet e metrosë së qytetit duhet ta lejojnë publikimin në stacione të një reklame pro-izraelite, që cilëson radikalët myslimanë si njerëz të egër. Ekspertët ligjorë thonë se nuk ka asnjë mënyrë për të shmangur Amendamentin e Parë të Kushtetutës amerikane, i cili mbron lirinë e fjalës, edhe nëse disa njerëz e konsiderojnë përmbajtjen ofenduese.

Zyrtarët e metrosë kishin ngritur shqetësime se kjo reklamë mund të nxisë dhunë, sidomos pas sulmit ndaj konsullatës amerikane në Libi. Aty shkruhet: "Në çdo luftë midis njeriut të qytetëruar dhe atij të egër, mbështet njeriu i qytetëruar. Mbështet Izraelin. Mposht xhihadin". Për shumë myslimanë, xhihadi përbën një luftë të brendshme shpirtërore. Por disa njerëz e kanë përdorur këtë koncept fetar si një justifikim për dhunë. Nihad Awad është drejtor ekzekutiv i Këshillit për Marrëdhëniet amerikano-islamike. Grupi mbron interesat e myslimanëve amerikanë. "Deri tani, shumica dërrmuese e atyre që e kanë parë reklamën e kanë dënuar atë. Kanë dënuar fanatizmin, urrejtjen që mbart, si dhe organizatorët e saj", u shpreh ai.

Këto reklama janë sponsorizuar nga Iniciativa e Mbrojtjes së Lirisë Amerikane, një grup pro-izraelit që thotë se lufton kundër islamizimit të Amerikës. Dy organizata amerikane për të drejtat civile e cilësojnë atë si një grup që nxit urrejtje. Zyrtarë të metrosë së Washingtonit thonë se FBI-ja është duke hetuar një kërcënim për dhunë, nëse reklama vendoset. Ka patur disa njoftime mbi gjeste vandalizmi të vogla kundër reklamës në New York, por kritikat në përgjithësi kanë qenë të kufizuara.

Albanian Screen