Rama: S’do të pastrojmë administratën, por shtetin shqiptar nga korrupsioni

Kryeministri: Do të çlirojmë shumë shpejt ekonominë nga monopolet

Kryeministri shqiptar, Edi Rama, deklaroi dje në konferencën e parë për shtyp, të zhvilluar në rrjetet sociale se nuk do të ketë spastrim të administratës, por pastrim të saj nga korrupsioni. Rama deklaroi gjithashtu se do të nisë një reformë e thellë në drejtësi, si dhe do të ndalet situata monopol në ekonomi, ku ka përmendur edhe emra…

Po flitet për një projekt të Serbisë së madhe ku qeveria e Saliut ka marrë pjesë me konsensus në të. Pse nuk reagoni?

Nuk ka asnjë projekt të tillë, qeveria e mëparshme ka plot faje, por jo këtë.

A do të ketë kallëzim penal për ish-pushtetarët “në qoftë se” do të perceptohen afera korruptive?

Padyshim që po.

A do t’i shohim siç nuk i kemi parë dhe institucionet në nivel lokal, por edhe shkollat, universitetet etj?

Programi ynë dhe plani i veprimit i Ministrisë sonë të Arsimit janë shumë inkurajues.

Universitetet publike janë kthyer në vatra korrupsioni, si do veproni me “sekserët” e provimeve?

Do të jemi gati për të monitoruar me thellësi e transparencë vërtetësinë e provimeve.

Z. Kryeministër, si do të veproni kundër korrupsionit, duke filluar nga institucionet e larta deri tek ato të vogla?

Do të reformojmë strukturat dhe do të godasim të korruptuarit.

Kur do i vijë fundi kaosit në Tiranë? Ngado parregullsi, kaos dhe plot me policë. Kaq e vështirë të jetë rregulli?

10 ditët e para në detyrë të ministrit të Brendshëm premtojnë shumë, jam i bindur se ne do ta kthejmë Policinë e Shtetit në detyrë.

Matura Shtetërore sivjet kishte 5 provime + mesatarja= 6.100/6=16.6% vlen mesatarja në fund të 4 viteve. Priten ndryshime?

Matura Shtetërore do të reformohet në funksion të konkurrencës dhe meritës.

Z. Rama, a do të hiqet TVSH për produktet e shportës, si të importuara apo të vendit në fillim të vitit 2014?

Ne do mbajmë zotimet tona dhe do të përgjigjemi për to një për një në fund të mandatit. Si fillim duhet të ndalim rënien e madhe!

Z. Kryeministër kur do ndërrohet drejtori i Përgjithshëm i AKU-së? Do mbahen në punë njerëzit që vërtet vlejnë?

Çdo shërbëtor i këtij shteti që është në detyrë falë meritës do të qëndrojë në detyrë dhe do respektohet shumë më tepër se deri sot.

Zoti Rama, si prind fëmije kërkoj të na ktheni dyqanet nëpër shkolla si shërbim shumë i domosdoshëm për fëmijët tanë.

Nëpër shkolla nuk do të ketë aktivitete tregtare. Kanë rezultuar shumë problematike dhe në dëm të cilësisë së shkollës.

Pas një kontributi 20 vjet për PS, me urdhër të Ministrisë së Arsimit për heqjen e dyqaneve nëpër shkolla mbetëm të papunë!

Dyqanet në shkolla janë një fenomen i papranueshëm për mbarëvajtjen e procesit mësimor dhe edukativ të nxënësve.

Si do të veprohet me vendimet e marra nga qeveria e larguar, në mbledhjen e saj të fundit me dt.05/09/2013?

Kemi nisur shfuqizimet sikundër jemi zotuar publikisht dhe do të vazhdojmë.

Jam një qytetar nga Vlora, të cilit më është zaptuar prona private me forcë. Çfarë do bëhet me ndërtimet pa leje?

Qeveria ka bërë gati bazën ligjore për një ndërhyrje të fortë kundër ndërtimeve pa leje.

Çdo bëhet me protestën e studentëve të Juridikut? Po me të shkarkuarit e policisë dhe shkrirjen e Gardës?

Po ndjekim me vëmendje edhe të parën edhe të dytën.

Z.Rama, Unaza se Re është në varësinë e njësisë nr. 6 dhe të Komunës Kashar. A do të kalohet në varësi të Bashkisë Tiranë?

Është një anomali e kudondodhur dhe do ta shërojmë përmes reformës tërësore të administrimit të territorit.

Cili është plani juaj në lidhje me bulevardin e ri. Çfarë do bëhet me qytetarët që po grabiten nga Basha, na ndihmoni…

Po e shohim me kujdes.

Për mungesë fondesh, vizioni dhe keqmenaxhimi, filmi shqiptar po kalon ditë të errëta. Çfarë politikash kini ju?

Kriza e ekonomisë dhe financave të vendit është e thellë. Po përgatitemi për një ndërhyrje radikale. Do ta kapërcejmë së bashku.

Cilat janë hapat që keni menduar për “çlirimin e Shqipërisë” nga KLD e mafia ekzistuese gjyqësore? Apo 4 vjet pritje?

Shumë shpejt nis punën një grup ekspertësh për të çuar më tej reformën në drejtësi.

Kur do kemi një stadium europian zoti Kryeministër se gjithë Europa qesh me ne! Dhe çfarë do bëni për sportin?

Do ta nisim nga sporti për të gjithë. Të premtosh stadiume në kohë krize ekonomike është një sport i së shkuarës

Jam një banor i Vlorës në lagjen time nuk ka ujë të pijshëm dhe asnjë rrugë të shtruar…

Do të punojmë së bashku për t’i shëruar plagët e vjetra të Vlorës e të gjithë Shqipërisë.

Çfarë vendimi do merrni me institucione si TVSH, ATSH..etj?

Do t’ia kthejmë publikut.

Do të shtyni ligjin e nëpunësit civil, një precedent i rrezikshëm, çfarë ju shtyu të merrni këtë risk?

I rrezikshëm është vakumi që krijon ligji në fjalë si i pazbatueshëm për mungesë aktesh nënligjore.

A do të ketë një akt të posaçëm për ata nëpunës me 20 vite në profesion që u hoqën nga puna me një letër?

Gjithkujt do t’i jepet mundësia të konkurrojë.

Keni deklaruar se do të zhvillohen konkurse për punësimet në administratë. Ku konsistojnë këto konkurse?

Do të ketë vazhdimisht njoftime publike sipas ligjit.

Kur do lirohen hapësirat publike ku lulishtet e Laprakës që ju keni bërë sot Luli i ka mbushur me tavolina e karrige?

Kjo është pyetje për Bashkinë.

Keni deklaruar para zgjedhjeve që në shumë shkolla të vendit matematikën e jep një militant i partisë? Çdo bëhet?

Çdo vajzë e djalë që ka mbaruar mësuesi dhe çdokush që dëshiron të bëhet mësues do ketë shansin të konkurrojë.

A do mund të konkurrojmë ne që humbëm punën, pasi kandiduam për PS, sepse znj.Nikolla tha asnjë mësues s’do largohet?

Mësuesit s’janë të partisë, po të fëmijëve e nxënësve të Shqipërisë! Koha e ngjyrimit politik të mësuesve ka mbaruar.

I dashur Edi, sot mora vesh që është emëruar drejtoreshë Tatimesh një person që s’ka fare njohuri për fushën! Mbi ç’kritere zgjedhja?

Keni informacion të gabuar, shumë shpejt rezultatet do të tregojnë vlerën e përzgjedhjes së bërë.

A mundet të ketë rilindje me 2 bashkëkryetarë? Çfarë do të bëhet për sportin, kam parë programin dhe s’kishte shumë për sportin…

Me siguri do keni parë programin e PD dhe keni parasysh PD në shumë bashkëkryetarësi:-)

Konkurrenca e paligjshme në biznesin privat. Ç’masa do merren nga qeveria juaj për këtë problem?

Formalizimi i ekonomisë do të jetë objekt i palëvizshëm i përpjekjes sonë.

Si do zgjidhet problemi i plehrave dhe ndotjes së mjedisit. Po për ato që djegin gëlqere me plastikë e goma çdo bëhet?

Thamë do ndalim importin e plehrave dhe e bëmë që ditën e parë të qeverisjes. Një Shqipëri e pastër është ambicia jonë!

Pse po shkatërrohen hekurudhat? Në çdo shtet ku ka demokraci ka hekurudha ka 23 vjet që Shqipërinë po shkatërrojnë…

Sepse shteti ka ikur në drejtim të paditur dhe ne përditë do të punojmë pa u lodhur ta kthejmë në krye të detyrës.

Jam oficer i nivelit të lartë në Gardën e Republikës. Ndalojeni ristrukturimin e tipit “hiq tropojanë dhe vendos tepelenas”…

Garda e Republikës është strukturë që s’e ka shoqen në botën bashkëkohore. Shkrirja e saj është nevojë strukturore e shtetit.

Do përfitojnë nga këto legalizime edhe shfrytëzuesit e hapësirave të përbashkëta te pallatet e Tiranës?

Hapësirat e përbashkëta të zaptuara për qëllime fitimi do çlirohen.

Çfarë do bësh me fëmijët që kanë probleme në pasaporta në Greqi?

Po punojmë për zgjidhjen përfundimtare të këtij problemi të trashëguar nga pakujdesia e qeverisë së mëparshme.

Si shpjegohet mospërfshirja e Taulant Ballës në kabinetin qeveritar kur Librazhdi doli rrethi më i votuar pro PS?

Taulant Balla është nënkryetar i grupit tonë parlamentar dhe drejtues i delegacionit tonë në Parlamentin Europian.

Deri kur do të vazhdojë vjedhja që çdo muaj na bën KESH dhe ujësjellësi në fatura?

Normalizimi i sistemit të energjisë është prioritet shumë i rëndësishëm.

A keni ndonjë program për emigrantët shqiptarë?

Do të jemi më pranë emigrantëve se qeveritë paraardhëse.

Çfarë do të bëhet me aeroportin dhe me kompanitë e rrugëtimit. Do vazhdojë monopoli (BelleAir)?

Goditja e monopoleve është pjesë e programit tonë. “BelleAir” ka një pozicion të privilegjuar dhe problematik në treg.

A do ta mendoni seriozisht pastrimin me themel të administratës aktuale të Shqipërisë?

Ne nuk do të pastrojmë administratën nga njerëzit, por shtetin nga korrupsioni.

Ndërtimet pa leje në zonën e Golemit kur do t’i hiqni? Ato po e ndotin shumë plazhin

Bregdeti do të jetë në fokusin e vëmendjes sonë.

Mund ta dimë çfarë do bëhet për punësimin e të rinjve dhe si do veprohet për punësimin?

Do të krijojmë hapësira të reja punësimi për të rinjtë përmes arsimit profesional, investimeve prodhuese, konkurseve reale.

A mendoni se duhet ndërhyrë në sistemin e arsimit në lidhje me librat që ju shpërndahen nxënësve?

Jam absolutisht dakord.

Mbaj premtimin për punësim këtej nga Selenica e Vlorës po vdes populli për bukë, po hanë akoma ata njerëzit e Salës.

Qeveria s’ka mbushur ende pesëmbëdhjetëditëshin dhe nuk ka asnjë shkop magjik për t’i ndryshuar gjërat sa hap e mbyll sytë!

Jam një 21-vjeçar që kam kontribuar sado pak në PS dhe po kërkoj një takim me Kryeministrin Edi Rama…

Rrjetet sociale janë një hapësirë takimi dhe ja ku po komunikojmë. Por mund edhe të më shkruani e-mail direkt.

Në reformimin e Policisë së Shtetit do të largohen punonjësit e policisë me diploma false?

Kam besim të plotë se në një kohë të shkurtër do të shohim një polici tjetër dhe do të kemi një polici me të tjera parametra.

Do shkojë ndonjë nga ish-ministrat që ju akuzoni para drejtësisë, apo do i falim dhe kësaj here?

Qeveria as shpall dënime as jep falje. Lufta jonë me të korruptuarit do jetë frontale.

Mbas sa kohësh, nën qeverisjen tuaj, do fillojmë të shohim ndryshim për sa i përket papunësisë, krimit dhe rendit?

Siguria do të vijë më shpejt sesa punësimi, por pas katër vitesh do ballafaqohemi me çdo zotim.

LSI-së i keni dhënë Pogradecin (emërtimin e drejtorëve: Posta, OSSH, Spital). Ku janë konkurset/meritat? Në vend të ministrive, LSI-së i keni dhënë qytetet (Pogradecin). Ku është ndryshimi nga PD-ja këtu? Po vihen drejtorë të paaftë…

Me LSI s’kemi ndarë qytete, por përgjegjësi.

A do ta kontrolloni edhe bujqësinë, farërat, plehrat kimike helmet e ndryshme?

Është zotim i yni. Do të bëjmë për fshatin shumëçka fshatit i është mohuar në këto vite.

Infermierët që punojnë në Fier nëpër spitale fillojnë punë në 9 dhe e lënë në 12:00…

Nuk do vazhdojë gjatë kjo gjendje, shpejt do të shihni përmirësimet.

Meqë e vendose të shkrish Gardën ku u bazove?

Në praktikat më të mira ndërkombëtare.

A do ndërmerrni ndonjë iniciativë që t’i bëni “të zbatueshme” marrëveshjet e shqiptarëve në Maqedoni?

Jemi në mbështetje të plotë të vëllezërve tanë në Maqedoni e mbetemi të shqetësuar për moszbatimin e marrëveshjeve.

Sot isha në spitalin onkologjik Tiranë “Nënë Tereza”. Doktorët janë kasapë. Të shohin nga duart…

Spitali “Nënë Tereza” po ndryshon dhe do ndryshojë përditë pa ndalim, derisa të bëhet një spital normal.

Faleminderit. Në opozitë kishte më shumë kohë për të folur…Kaq për sot të dashur miq, me lejen tuaj po kthehem në punë. Bashkë do t’ia dalim.

Shqip