Pukë, dy të moshuara jetojnë në mjerim, apel për ndihmë

Në mesin e vuajtjes e skamjes dikur në rini, në vetmi dhe varfëri në pleqëri. Ky është fati i Suta Ndojës 80-vjecare dhe njerkës së saj Mrikës që i ka kaluar të 90-tat, por që sërish i duhet të mbajë në shpinë ashtu si dikur. 

Dy të moshuarat që jetojnë në fshatin Ukthë të komunës së Qelzës, njëri prej fshatrave më të thellë të Pukës, edhe pse të pamundura, ato mundohen të sfidojnë vetminë teksa punojnë sa munden për të jetuar në kullën shekullore, që sit ë mos mjaftonte rrezikon edhe shembjen. 
Dimri për to duket se është periudha më e vështirë, pasi trashësia e dëborës i izolon ato me muaj të tërë, duke ua vështirësuar edhe të ushqyerit. 

“Këtu jetojmë vetëm ne të dyja, në dimër mbledhim dru e ushqim, i djegim e rrimë këtu”, rrëfen njëra prej tyre. 

E bindur se gjendja e tyre do jetë keqëardhje për këdo që i shikon, nënë Suta lëshon edhe këtë urim “Kush na ndihmon ndihmoftë zoti!” 
Të përhumbura në vitet e pleqërisë, tashmë edhe mes skamjes e mjerimit, pa përkujdesje këto dy gra mbeten në pritje të ndihmave, në artikuj ushqimorë, në mënyrë që izolimi i dimrit të sivjetshëm të jetë më i lehtë për ta.

Balkanweb.com