Paketa fiskale 2013, qeveria ndryshon 7 taksa

Qeveria ka miratuar disa vendime që kanë impakt në 7 ligje tatimore. Një ndër me të rëndësishmet lidhet me tregtinë e kafesë, për të cilën janë lehtësuar ndjeshëm tarifat doganore. Sipas vendimit të djeshëm të Këshillit të Ministrave, akciza për kafen e papjekur nga 30 lekë për kilogram bëhet zero. Akciza e kafesë së pjekur, nga 140 lekë zbret në 60 lekë për kilogram dhe tarifa doganore për kafenë, nga 10 për qind bëhet zero. Këto ndryshime në ligjin “Për akcizat” janë propozuar pas diskutimeve që janë bërë me importuesit e kafesë dhe problemeve të krijuara nga mbajtja e këtyre akcizave në një nivel relativisht të lartë. Këto akciza do të ndikojnë në uljen e kostos së përpunimit të kafesë, nxitjen e prodhimit vendas për përpunimin e kafesë, nxitjen e uljes së informalitetit në këtë industri, ku suksesi është shumë i madh, pasi është trefishuar sasia e kafesë së zhdoganuar”, – tha kryeministri Sali Berisha. Me këtë vendim bëhet një përafrim i nivelit të akcizës së kafesë në Shqipëri me vendet e rajonit. “Biznesi i kafesë fiton nga kjo ulje rreth 300 milionë lekë. Kjo është një industri me përdorim shumë të gjerë në Shqipëri. Kafeja është hobi e mund të them se jemi ndër vendet që e përdorim më shumë dhe kjo është shumë interesante, sepse ne nuk e rrisim as vetë”, – tha Kryeministri. Gjithashtu, qeveria vendosi dje pesëfishimin e masës së gjobës në rastet e konstatimit të punonjësve të pasiguruar. Ky vendim referuar deklaratës zyrtare të qeverisë, synon të ulë informalitetin në sektorin e punësimit. Po ashtu, me kërkesë të universiteteve jopublike, qeveria ka parashikuar heqjen nga detyrimi tatimor për bursat që akordohen për nxënësit apo studentët e ekselencës apo për të varfrit. Referuar vendimit, çdo vit universitetet private duhet të dorëzojnë listën e bursave të akorduara pranë Ministrisë së Arsimit, me qëllim që ato t’u shënohen si shpenzime të zbritshme. Në përgjigje të debatit të hapur së fundmi në lidhje me prerjen e pyjeve me qëllim eksportimin e lëndës drusore, qeveria miratoi vendimin që parashikon vendosjen e një takse të veçantë për lëndën drusore që eksportohet. Taksimi me 30 për qind i lëndës drusore që eksportohet ka si qëllim dekurajimin e eksportimit të lëndës drusore, me qëllim ruajtjen e pasurisë pyjore të vendit. Miratimi i paketës së re fiskale vjen një javë pas miratimit të projektbuxhetit të vitit 2013. Një vendim tjetër i miratuar nga qeveria është ai që heq tatimin mbi disa kategori të ardhurash, mes të cilave, të ardhurat nga dëmshpërblimet apo shpërblimet. Në kuadrin e një pakte të re fiskale qeveria vendosi dje të përjashtojë nga detyrimi i ligjit “Për tatimin mbi të ardhurat”, të ardhurat e përfitimit nga dëmshpërblimet e marra me vendim të formës së prerë të gjykatave, si dhe të kompensimit të kostove gjyqësore, të ardhurat e përfituara nga institucionet shtetërore për arritje në shkencë, sport, kulturë. Një vendim tjetër shumë i rëndësishëm është projektligji për disa ndryshime në ligjin për taksat kombëtare. Sipas këtij projektligji, vendosen eksporte për lëndën drusore dhe kjo masë propozohet të jetë 30 për qind. Kjo taksë do të mblidhet nga administrata doganore në momentin e eksportimit dhe komisioni i agjentit tatimor propozohet të jetë zero.

Paketa e ndryshimeve fiskale:

-Hiqen taksat për kafen që importohet;

-Hiqen nga tatimi të ardhurat nga dëmshpërblimi;

-Bursat llogariten si shpenzime të zbritshme;

-Vendoset taksa 30 % për lëndën drusore që eksportohet;

-Pesëfishohet niveli i gjobave për punonjësit e padeklaruar.

Akciza për kafen:

-Hiqet tarifa doganore prej 10%;

-Hiqet akciza për kafen e papjekur;

-Ulet akciza për kafen e pjekur, nga 140 në 60 lekë.

Mapo