Nis viti i ri akademik, 162 mijë studentë nëpër auditore

Startoi sot viti i ri akademik. Universitetet në të gjithë vendin hapin dyert sot për të pritur rreth 162 mijë studentë. Ministrja e Arsimit Lindita Nikolla do të jetë e pranishme pranë Fakultetit të  Ekonomikut, ku do të japë dhe urimin për sezonin e ri shkollor të arsimit universitar.

Ndërkohë që, për programet e studimit me kohë të pjesshme dhe edukimin në distancë, viti akademik do të fillojë në datën 21 tetor 2013.  Sipas udhëzimit të ish ministrit Myqerem Tafajt, periudha 24 dhjetor 2013 deri 5 janar 2014 do të jetë periudhë pushimesh për studentët. Sa u takon studentëve që do të ndjekin vitin e parë të studimeve, ata duhet të bëjnë regjistrimin pranë sekretarive të fakulteteve përkatëse. Fillimisht duhet të kryhet pagesa, ndërsa së bashku me mandat-pagesën duhet të paraqiten nëpër sekretaritë e fakulteteve në të cilët janë shpallur fitues përmes Formularit A2.

Sakaq numri i regjistrimeve të studenteve pranë universitetit “Eqerem Çabej” në Gjirokastër, ka rezultuar tepër i ulët. Nga 2013 kuota të vendosura nga Ministria e Arsimit dhe Shkencës, 1446 prej tyre rezultojnë bosh. Konkretisht, fakulteti i Edukimit dhe Shkencave Natyrore ka regjistruar 218 studentë nga 973 që është kuota, ndërkohe që fakulteti i Edukimit të Shkencave Shoqërore nga 1040 vende, vetëm 349 prej tyre janë regjistruar. Kuotat e vendosura nga Ministria e Arsimit për këtë universitet, i cili është më i madhi në jug të vendit, duket se janë të paarritshme për vitin e ri akademik.

Degët të cilat shënojnë numrin më të vogël të regjistrimeve, janë matematike-fizika me 3 studentë nga 170 vende, ndërsa në gjuhën italiane nuk rezulton asnjë regjistrim.

SHQIP