Nga pamja “madhështore” e sallave të reja : Arka e shtetit është bosh

Blerina Gjoka

Pamja e sallës, nga ku kishte zgjedhur sonte kryeministri Edi Rama t’u fliste ambasadorëve të huaj në Tiranë, binte shumë në konstrast me atë çfarë do të thoshte ai vetëm pak pasi “uau” e të pranishmëve do të shuheshin nga vezullimi e madhështia e mureve të Kryeministrisë nën shkëlqimin e së kuqes (ngjyra e preferuar e Ramës në mobilim…në zyra dhe në shtëpi). Akoma pa marrë veten nga ky ndryshim drastik i pamjes së kryeministrisë (dhe pse një punë me kontribut vullnetar, siç thotë Rama) ambasadorët do të dëgjonin nga kryeministri i “Rilindjes” deklaratën: Arka e shtetit është bosh! Një thirrje për ndihmë, a një aktakuzë për ata që ikën, apo thjesht një e vërtetë që kërkon vëmendje, deklarata e djeshme e Ramës ishte ajo që prishte imazhin e krijuar befas se Rilindja mund të vinte dhe vetëm nga ajo ngjyra e kuqe e mureve dhe hartat e stërmadhe që vareshin në to. Por ndriçimi i bukur ishte vetëm një mirazh…për të shkuar tek Rilindja e vërtetë duhej kaluar nëpërmjet detit…”Nga e thëna në të bërë ka në mes një det të tërë”, e tha vetë Edi Rama.

Ambasadorët e huaj që jetojnë  në Tiranë i dinë problemet e këtij vendi si kryeministri e ndoshta dhe më mirë….ndoshta ata nuk janë të suprizuar më shumë nga ngulmimi i tij se qeveria e tij është një qeveri proevropiane e proamerikane, e butë me fqinjët, e egër me Asad, e përulur ndaj Brukselit, se sa nga arkitektura e re e godinës së ndërtuar nga Italia fashiste, ku kanë jetuar e punuar me dhjetra kryeministra që as i ka shqetësuar më parë ngjyra e mureve apo perdet.

Deklarata e Ramës:

“Ekonomia është në një ngërç, arka sot është bosh, u ka borxh kompanive shqiptare dhe bankat sot nuk japin kredi kur kreditë e këqija janë rritur. Nuk na mungojnë zgjidhjet për të ndalur rrënimin, përkundrazi çdo krizë është një rrugë për të dalë më të fortë dhe unë jam i bindur se ne nuk do ta humbim këtë rast. Jemi në konsulta intensive me Guvernatorin e Shqipërisë, ekspertë të rangut ndërkombëtar dhe ato të FMN dhe BB. Do të hapim konsultime me sipërmarrjen vendase dhe do të ngrejmë Këshillin Ekonomik Kombëtar që do të punojë me statistikat dhe stategjitë ekonomike për vendin. Shpejt do të nisë dhe auditi ndërkombëtar i financave të vendit për të parë pasqyrën e vërtetë të gjendjes në cilën kemi marrë financat që mund të jenë më keq se ç’mund të prisnim, në këtë stad të qeverisjes”.

MAPO