Masat shtrënguese, Parlamenti grek miraton paketën

Maxhoranca qeverisëse në Greqi ka sfiduar protestat e dhunshme përpara Parlamentit, e ka arritur të miratojë në orët e para të mëngjesit të së enjtes, paketën e re të masave të kursimit. Këto masa të cilat sipas kryeministrit të vendit, Antonis Samaras do të jenë të fundit në kalvarin e gjatë të nisur tre vjet më parë, janë të domosdoshme që kreditorët ndërkombëtarë të Athinës të lëvrojnë këstin e radhës së ndihmës financiare, pa të cilën vendi shkon në falimentim në fund të nëntorit. 

Ligjvënësit miratuan shkurtimet në shpenzime, rritjen e taksave e masat që lehtësojnë pushimin nga puna, pasi mbi 100 mijë grekë me flamuj e me thirrje luftarake bllokuan sheshin Sintagma të Athinës. Edhe pse partneri më i vogël i koalicionit qeverisës, e Majta Demokratike abstenoi në votim, konservatorët e Samaras dhe socialistët e PASOK arritën të kenë 153 vota për të miratuar paketën, në parlamentin 300 vendësh. 

Dokumenti 500 faqësh u miratua duke i kushtuar përjashtimin gjashtë deputetëve të PASOK dhe një, Demokracisë së Re, pasi dolën kundër vendimit partiak e nuk votuan reformat. Kryeministri Antonis Samaras i bëri apel parlamentit të tregojë unitet, pasi miratimi i paketës do ta ngrinte Greqinë në këmbët e veta dhe do të ndihmonte të tejkalonte krizën. 

"Nëse Greqia mban me këmbëngulje kursin për të cilin është angazhuar, ajo do të dalë nga kriza. Unë do ta fitoj këtë bast. Kërkoj që ne ta përmbushim detyrimin tonë këtu, së bashku, dhe po së bashku ta arrijmë objektivin e daljes nga kriza. Vetëm kaq po kërkoj, as më shumë e as më pak",-u shpreh ai. 

Më herët gjatë ditës së djeshme, përleshje të ashpra u regjistruan në Athinë, me përdorimin e koktejeve plasëse nga protetsuesit, ndërsa policia përdori gazin lotsjellës. Kaosi përfshiu edhe sallën e Parlamentit, kur punonjësit ndaluan punën duke bllokuar seancën për shkak se morën vesh se edhe pagesat e tyre do të shkurtoheshin.

Albanian Screen