Lutaj: Krimi ka vrarë shtetin. Berishës duhet t’i hiqet antiplumbi, jo t’i japim dhe automatik

Deputeti socialist i qarkut të  Fierit , Piro Lutaj komenton vrasjen e komisarit Dritan Lamaj.

“Vrasja e kryekomisar  Dritan Lamajt, në të gjitha këndvështrimet  e veta rezultoi se  ishte një vrasje e paralajmëruar. Shfaqja e drejtuesve të lartë të policisë  në një tavolinë me personin  e akuzuar  si vrasës  i kryekomisarit Dritan Lamaj  zhvlerëson çdo lloj alibie të kupolës drejtuese të policisë, madje edhe vetë ministrit të Brendshëm, për lidhjet  e drejtpërdrejta të tyre me kriminelë  vrasës. Do të më vinte shumë çudi, nëse vërtet drejtuesit kryesorë  të këtij shteti nuk kanë kuptuar se para një jave  nuk është varë një komisar policie  me emrin Dritan, por është vrarë vetë shteti. Madje ëshë rivrarë shteti për të disatën herë”, thekson Lutaj për GSH.

Lirimin e gardistëve Lutaj e  konsideron si një lajm tronditës për të gjithë opinionin publik.

“Sigurisht që ishte një lajm tronditës për të gjithë opinionin publik. Nuk ia vlen të komentohet, jo se është një vendim gjykate , por sepse  ky vendim është akt barbar që i rivrau  për së dyti 4 dëshmorët e 21 janarit. Akoma më  kriminale janë  veprimet që ka kryer  një ekspert i kriminalistikës i Ministrisë së Brendshme, duke cënuar provat e duke futur  nëpër trupat e viktimave sende të ndryshme. Këto janë veprime paralizuese për çdo njeri që shpreson se  këtu mund  të ketë ndonjëherë drejtësi”, shprehet Lutaj.

I pyetur se përse  qeveria kërkon pajisjen me armë  të deputetëve, kryetarëve të komunave apo edhe biznesmenëve, ai shprehet: “do të perifrazoj këtu thënien e një kolegu, deputet i PS-së, i cili tha “…ne  po ju themi që të gjithë bashkë  duhet të punojmë  që t’i heqim jelekun antiplumb kryeministrit, ndërsa ju po punoni për ta pajisur atë edhe me automatik’’.

Përsa iu përket zgjedhjeve, ai shprehet se më  23 qershor “matematicienët e zyrave” nuk do dinë ku të fusin kokën.

   TEMA