Krimi kompjuterik, arrestohen hakërsat shqiptarë

UPDATE- Tre persona janë arrestuar dhe dy të tjerë janë shpallur në kërkim, të akuzuar veprimtari kriminale në fushën kompjuterike. Në kuadër të operacionit të shtrirë në të njëjtën kohë në rrethet Tiranё, Fier, Elbasan dhe Vlorё ëhstë bërë i mundur ndalimi i këtyre personave, pjesëtarë të grupit të ashtuquajtur “Albanian Hackers Group.” 

Në pranga kanë rënë shtetasit,  Arif Hiqmet Kasa, 21 vjeç, banues në Elbasan,  Enea Agim Xhani, 18 vjeç, banues në Domje të Tiranës dhe   Aldo Nebi Ymeraj, 20 vjeç, banues në Fier. Ndërkaq janë shpallur në kërkim shtetasit e mitur me inicialet M. Sh., 17 vjeç dhe F.H. 17 vjeç. 

Të akuzuarit si pjesëtarë të grupit të ashtuquajtur “Albanian Hackers Group” dyshohet se në bashkëpunim me njёri-tjetrin janë implikuar në:    “Thyerjen e paligjshme të faqeve elektronike të subjekteve të ndryshme shtetërore apo private dhe vjedhjen e bazave të të dhënave të administruara në këto sisteme kompjuterike, përfshirë këtu edhe ndërhyrjen në sistemin kompjuterike të disa subjekteve televizive në vend.  Thyerjen dhe vjedhjen e paligjshme të të dhënave të aksesit nëpërmjet teknikave të paligjshme kompjuterike për të realizuar hyrjen e paautorizuar kompjuterike në profilet e përdoruesve të ndryshëm të rrjeteve sociale dhe kompanive të shërbimit të postës elektronike si “Facebook”, “YAHOO”, GMAIL” etj, me qëllim përfitim personal. Vjedhjes nëpërmjet teknikës “phishing” dhe përdorimin e paligjshëm me qëllim përfitimi personal e të dhënave, të të paktёn 130 kartave bankare, të cilat janë lëshuar nga banka shqiptare dhe të huaja për klientët e tyre, duke kryer blerje në dyqane elektronike në Internet, të mallrave dhe shërbimeve, bileta udhëtimi, etj. Shuma e pёrfituar nga kёto veprime arrin deri nё 12 500 euro.  Klonimin e kartave bankare duke pёrdorur pajisje artizanale pёr kryerjen e saj.” 

Në cilësinë e provës materiale janë sekuestruar një pistoletё e markёs TT, lёndё e dyshuar narkotike “Cannabis Sativa”, njёsi kompjuterike desktop 6 copё, njёsi kompjuterike “laptop” 2 copё, hard disk i jashtёm 1 copё, pajisje MCR qё shёrben pёr klonimin e kartave bankare 1 copё, lëndë narkotike e dyshuar Canabis Sattiva 200 gram, karta bankare tё dyshuara tё klonuara 10 copë,   CD 120 copё, telefona celular 8 copё, dhe  USB 3 copё.

PANORAMA