Kosovë, Limaj në Gjykatën Supreme

Deputeti i Partisë Demokratike të Kosovës, Fatmir Limaj ndodhet në Gjykatën Supreme të Kosovës, së bashku me tre ish-bashkëluftëtarë të tij, Naser Shala, Nexhmi Krasniqi dhe Naser Krasniqi.

Limaj është dërguar me një makinë të misionit europian, EULEX, pasi për më shumë se dy orë ka qëndruar në bazën e këtij misioni, në periferi të Prishtinës, ku është marrë në pyetje.

Mësohet se Limaj dhe të tjerët janë paraqitur në gjykatë për rastin “Kleçka”, ku akuzohen për krime lufte gjatë konfliktit në Kosovë.

Ish-komandant Çeliku, që mban edhe pozitën e nënkryetarit të PDK-së, do të rigjykohet bashkë me tre ish-bashkëluftëtarët Naser Shala dhe Nexhmi e Naser Krasniqi.

Deri më tani konfirmohet zyrtarisht se prokurori ka kërkuar që ndaj Naser Shalës të shqiptohet masa e paraburgimit. Kjo është konfirmuar nga avokati i Shalës, Bajram Tmava, i cili ka thënë për Top Channel se janë në pritje të vendimit.

Ditën e martë Gjykata Supreme vendosi që çështja të rihapet, por nuk pranoi kërkesën e palës së akuzës që në të të merren parasysh dëshmitë e Agim Zogajt, i njohur ndryshe si “Dëshmitari X”.

Limaj dhe bashkëluftëtarët e tij akuzohen nga prokuroria e misionit evropian për krime lufte të kryera ndaj popullsisë civile në fshatin Kleçkë.

Në proçesin e zhvilluar në shkallën e parë ish-ministri i Transporteve dhe të pandehurit e tjerë u shpallën të pafajshëm nga akuzat e ngritura.

Ndërkohë, më herët gjatë muajit, një prokuror i EULEX-it ngriti aktakuza të reja ndaj Fatmir Limajt dhe gjashtë personave të tjerë, këtë herë për krim të organizuar dhe vepra të tjera penale, të lidhura me korrupsion në të ashtëquajturën çështje të Ministrisë së Transportit dhe Post-Telekomunikacionit.
 

Top-channel