Greqi, ja cilat janë masat e dhimbshme të Memorandumit

Një paketë me masa fiskale në shumën 13.9 mld euro, që cilësohen tepër të vështira, do të dërgohet për miratim në Parlamentin grek javën e ardhshme. 

Largimi nga puna i 5000 nëpunësve civilë këtë vit dhe 20 000 të tjerëve vitin e ardhshëm, rritja e faturave të energjisë elektrike, shkurtim i pensioneve, rritja e moshës së pensionit, reduktimi i ndihmave sociale, unifikim pagash në administratë, rritje e kontributeve për sigurimet shoqërore dhe rritje taksash; këto dhe të tjera masa të dhimbshme do të merren në këmbim të disbursimit të këstit të ndihmës për Greqinë. 

Memorandumi përfshin masat e mëposhtme: 

1. Këtë vit do të largohen nga administrata publike 5000 punonjës dhe 20 000 të tjerë në vitin 2013 (në total 25 000 nëpunës civilë) 

2. Shkurtime drastike të 2 000 punonjësve rezervë nga 15 226 

3. Hiqen dhuratat shtesë dhe kompensimet e festave për të gjithë nëpunësit civilë dhe pensionistët 

4. Nga 1 janari 2013 aplikohet unifikimi i listës së pagave me një tavan maksimal për të ardhurat bruto mujore, deri në 1900 euro 

5. Rritje e kontributeve të sigurimit edhe për siguruarit para vitit 1993 

6. Reduktohen pensionet nga 3%-12% 

7. Rritet me 2 vjet mosha e daljes në pension 

8. Taksohen të gjitha lojrat e kompanisë së basteve, OPAP 

9. Rritet me 25% çmimi i biletës në transportin publik urban, që nga marsi 2013 

10. Rriten me 8% faturat e energjisë elektrike, që nga 1 Janari 2013 

11. Shfuqizohen të gjitha përjashtimet nga tatimet 

12. Rriten taksat për fermerët dhe reduktohen rimbursimet tatimore për naftën dhe TVSH-në 

13. Zëvendësohen të gjitha ndihmat familjare në një, e cila do jepet bazuar në të ardhurat 

14. Shfuqizohen të gjitha përfitimet specifike për papunësinë sezonale 

15. Reduktohet norma specifike e pagave nga 1 gushti këtij viti, nga 2% deri në 35% 

16. Rritet në 15% nga 10%, tatimi i interesit për depozitat 

17. Ruhet deri në vitin 2018 taksa e jashtëzakonshme e solidaritetit 

18. Rritet deri në mars 2013, vlera e objektive e pasurive të patundshme, etj 

Sipas draftit të Memorandumit të ri pritet të ketë një zgjatje prej 2 vjetësh për rregullimet fiskale, që të arrihet për çdo vit 1.5% e PBB, kundrejt 3% pa një zgjatje 2 vjeçare.

Ballkanweb.com