Fyle: Në Tiranë për çështjen më vendimtare; çfarë duhet bërë që zgjedhjet të mos kontestohen

Komisioneri Europian për Zgjerim Stefan, Fyle, përmes një postimi në Twitter ka zbuluar në një farë mënyrë edhe qëllimin e kësaj vizite në Shqipëri. “Vizita në Tiranë për të bërë pyetjen më vendimtare: çfarë duhet bërë që zgjedhjet në Shqipëri të mos kontestohen”, – shkruan Fyle në Twitter.

Pra procesi i zgjedhjeve të ardhshme të 23 qershorit pritet të jetë në qendër të bisedimeve të komisionerit Fyle, me liderët e partive kryesore PD e PS, ndryshe nga sa mendohej deri më tani se, çështja e miratimin në parlament të tri ligjeve të përcaktuara nga Brukseli si kusht për marrjen e statusit të vendit kandidat do të ishte në qendër të kësaj vizite.

Fyle, i cili ka mbërritur në Tiranë qysh mbrëmjen e djeshme, ka zhvilluar mëngjesin e sotëm një takim me trojkën e ambasadorëve në vendin tonë, me ambasadorin e BE-së, Ettore Sequi, SHBA-së, Aleksandër Arvizu dhe të OSBE-së Eugen Wollfarth, por edhe me ambasadorë të tjerë të vendeve të BE të akredituar në vendin tonë.

Ambasadori i Holandës, Martin De la Beij ka folur për mediat pas takimit me komisionerin Fyle dhe u shpreh se zgjedhjet e 23 qershorit dhe çështja e integrimit ishin në qendër të takimit që komisioneri kishte zhvilluar me ambasadorët.

Kjo është hera e parë që komisioneri Fyle e nis vizitën e tij në Tiranë duke takuar fillimisht ambasadorët.

Ndërkohë, seria e takimeve të sotme pritet të nisë me kryeministrin e vendit, Sali Berisha rreth orës 10:45; me liderin e opozitës Edi Rama në orën 12:00 dhe në orën 13:10 pritet të zhvillohet takimi me Presidentin Bujar Nishani.
Pak ditë më parë, Fyle, nga Brukseli, u dërgoi një mesazh palëve politike shqiptare që të mos e humbnin shansin e fundit të Shqipërisë për integrimin saj europian, duke theksuar se mungesa e një kompromisi në plotësimin e kushteve të kërkuara nga KE do të thoshte se për Shqipërinë nuk do të kishte raport në pranverë të këtij vitit, siç do të ndodhë me vende të tjera të Ballkanit.

Në një koment në Twitter pak ditë para mbërritjes së tij në Shqipëri, Komisioneri Europian për Zgjerim Stefan Fyle , theksoi se zgjedhjet në Shqipëri janë të rëndësishme për të ardhmen e saj europiane, por ato nuk mund të zgjidhin çështje kritike, si “mungesën e kulturës së kompromisit dhe mungesën e përfshirjes”.

Komisioneri Fyle takon kreun e qeverise, Berisha dhe liderin e PS, Rama

Takimi i zhvilluar në ambientet e kryeministrisë mes kryeministrit të vendit Sali Berisha dhe Komisionerit për Zgjerim, Stefan Fyle ka zgjatur rreth 1 orë. Në këtë takim Fyle ishte i shoqëruar nga ambasadori i BE-së Ettore Sequi dhe në përfundim të tij, eurokomisioneri nuk ka bërë asnjë koment për mediat.

Më pas eskorta e komisionerit Fyle është nisur drejt selisë rozë, ku po zhvillohet takimi me kreun e PS-së Edi Rama.

SHQIP