Drejtori i ERE-s sfidon qeverinë, firmos 11 HEC-e

Ornela Manjani

-Drejtori i komanduar i Entit Rregullator të Energjisë ka firmosur 11 vendime licencimin e kompanive për ndërtimin e hidrocentraleve duke anashkaluar vendimin e Ministrisë së Energjisë dhe Industrisë për rishqyrtimin e të gjithë lejeve koncensionare. Kontratat mbajnë firmën e drejtorit të komanduar Shkëlqim Bozgo, i cili mban këtë post që prej largimit nga detyra të Sokol Ramadanit. Vendimet kanë marrë dje fuqinë e plotë ligjore, sipas të cilave kompanitë që sot mund të nisin zbatimin e projekteve. Kjo ndodh në kohën që një grup pune ka nisur punën për verifikimin e kontratave, madje ka vendosur edhe pezullimin e të gjithë lejeve të dhëna nga qeveria e shkuar në ditët e fundit të punës së saj. 

Vendimet 

Në ditët e para të detyrës si komanduar në krye të ERE-s, Shkëlqim Bozgo ka firmosur kontratat për ndërtimin e 11 HEC-ve. Kështu i jepet leje shoqërisë “Zall Herr Energji 2011” sh.p.k. në aktivitetin e prodhimit të energjisë elektrike nga HEC-et “Cekreze 1” dhe “Cekreze 2, shoqërisë “Zall Herr Energji 2001” sh.p.k. në aktivitetin e tregtimit të energjisë  elektrike,  shoqërisë “Hidrocentrali Qarr & Kaltanj” sh.p.k. në aktivitetin e prodhimit të energjisë elektrike nga HEC-et “Qarr” dhe “Kaltanj dhe shoqërisë “Hidrocentrali Qarr & Kaltanj” sh.p.k. për kualifikimin e impiantit prodhues për HEC-et “Qarr” dhe “Kaltanj” si burim i rinovueshëm energjie. Një tjetër vendim i ERE-s i jep të drejtë  shoqërisë “Shutina Energji” sh.p.k. në aktivitetin e prodhimit të energjisë elektrike nga HEC “Shutinë”, shoqërisë “Snow Energy” sh.p.k. në aktivitetin e furnizuesit të kualifikuar të energjisë elektrike, shoqërisë “Snow Energy” sh.p.k,  shoqërisë “Dans Energy Albania” sh.p.k. në aktivitetin e tregtimit të energjisë elektrike dhe kualifikimin e impiantit prodhues për HEC “Shutine”, të shoqërisë “Shutina Energji” sh.p.k. si burim i rinovueshëm energjie. 

Verfikimi 

Zëvendës kryeminsitri Niko Peleshi ka deklaruar se qeveria do të rishikojë të gjitha koncensionet e dhëna nga qeveria e mëparshme, të cilat nëpërkëmbin interesin e qytetarëve. “Pa cenuar marrëdhënien e besimin e investitorëve vendas, do të rishikojmë të gjithë kontratat që nëpërkëmbin interesin publik të shqiptarëve. Qeveria do të japë një frymë të re bashkëpunimit me biznesin, do të tregojmë integritet në raport me biznesin për të gjitha çështjet që e shqetësojnë. Do inkurajojmë biznesin e huaj e vendas për të shfrytëzuar potencialet që ofron Shqipëria. Vendi ka potencial shumë të madh tek biznesi privat për të ndihmuar projektin tonë madhor. Do t’i qëndrojmë linjës tonë për të shfuqizuar vendimet që dëmtojnë në themel interesin e qytetarëve. Do të jemi të hapur dhe inkurajues për të krijuar procedura që do të afrojnë biznesin vendas dhe të huaj drejt ekonomisë shqiptare. Kemi interes të inkurajojmë besimin e institucioneve publike te ndërkombëtarët, por dhe tek qytetarët e thjeshtë” theksoi Peleshi

Pezullimi 

Qeveria ka zyrtarizuar anulimet e para të koncesioneve, të dhëna në periudhën e tranzicionit politik. Ministri i Energjetikës, Damian Gjinkuri, përmes një urdhri ka vendosur të anulojë gjashtë leje koncesionare për ndërtimin e shtatë hidrocentraleve të dhëna nga Qeveria paraardhëse e demokratëve nga 22 gushti deri më 9 shtator. Përmes urdhrit, Gjiknuri ka anuluar koncesionin e hidrocentralit Blac, i hapur në datën 22 gusht, ato të HEC-eve Kaçinar dhe Lusën të dhëna në datën 23 gusht, si dhe koncesionin e HEC-it Gafer i akorduar në datën 26 gusht. Lista vazhdon edhe me HEC-et Dushaj, Katundi i Vjetër, Reja e Velës dhe Arsti.

11 vendimet e ERE 

Vendim i ERE nr. 84

Për fillimin e procedurave për licencimin e shoqërisë “Zall Herr Energji 2011” sh.p.k. në aktivitetin e prodhimit të energjisë elektrike nga HEC-et “Cekreze 1” dhe “Cekreze 2

Vendim i ERE nr. 85

Për fillimin e procedurave të licencimit të shoqërisë “Zall Herr Energji 2001” sh.p.k. në aktivitetin e tregtimit të energjisë elektrike

Vendim i ERE nr. 86 

Për fillimin e procedurave të shqyrtimit të aplikimit të shoqërisë “Zall Herr Energji 2011” sh.p.k. për kualifikimin e impiantit prodhues për hec-et “Cekrez 1” dhe “Cekrez 2” si burim i rinovueshëm energjie

Vendim i ERE nr. 87

Për fillimin e procedurave për licencimin e shoqërisë “Hidrocentrali Qarr & Kaltanj” sh.p.k. në aktivitetin e prodhimit të energjisë elektrike nga HEC-et “Qarr” dhe “Kaltanj

Vendim i ERE nr. 88

Për fillimin e procedurave të shqyrtimit të aplikimit të shoqërisë “Hidrocentrali Qarr & Kaltanj” sh.p.k. për kualifikimin e impiantit  prodhues për HEC-et “Qarr” dhe “Kaltanj” si burim i rinovueshëm energjie

Vendim i ERE nr. 89

Për licencimin e shoqërisë “Shutina Energji” sh.p.k. në aktivitetin e prodhimit të energjisë elektrike nga hec “Shutine

Vendim i ERE nr. 90

Për modifikimin e licencës së prodhimit të energjisë elektrike të shoqërisë “DN & NAT Energji” sh.p.k. me nr. 128, seria PV11P, lëshuar me vendim të Bordit të Komisionerëve të ERE-

Vendim i ERE nr. 91

Për licencimin e shoqërisë “Snow Energy” sh.p.k. në aktivitetin e furnizuesit të kualifikuar të energjisë elektrike

Vendim i ERE nr. 92

Për kualifikimin e impiantit prodhues për HEC “Koka 1”, të shoqërisë “Snow Energy” sh.p.k. si burim i rinovueshëm energjie

Vendim i ERE nr. 93

Për licencimin e shoqërisë “Dans Energy Albania” sh.p.k. në aktivitetin e tregtimit të energjisë elektrike

Vendim i ERE nr. 94

Për kualifikimin e impiantit prodhues për hec “Shutine”, të shoqërisë “Shutina Energji” sh.p.k. si burim i rinovueshëm energjie.

 SHEKULLI