Certifikatat, protestë e emigrantëve para Konsullatës, Selanik
Përfaqësues të disa shoqatave të emigrantëve shqiptarë në Selanik zhvilluan sot një protestë simbolike përpara zyrës së Konsullatës shqiptare në këtë qytet, për problemin që kanë krijuar toponimet greke në certifikatat e lindjes të fëmijëve të lindur në Greqi. Merrnin pjesë përfaqësues të shoqatave “Omonia”, të “Vllehëve të Shqipërisë në Selanik”, “Dega e Blertë”, “Progresi”, të cilët mbështeteshin nga PS, dega e Selanikut. Sipas tyre, çështja e certifikatave ende nuk ka gjetur zgjidhje dhe krijon problem për emigrantët në pikat kufitare Greqi-Shqipëri. Edhe pse protesta e sotme ishte simbolike për nga numri i pjesëmarrësve, në hyrje të ndërtesës, ku veç konsullatës shqiptare ndodhet edhe përfaqësia diplomatike amerikane, ishte vendosur një numër forcash policore dhe askush nuk lejohej të hynte brenda. Emigrantët kërkuan të takojnë konsullin shqiptar, Riza Poda, por ky i fundit nuk i priti, pasi siç sqaroi në një prononcim për 'News 24', ka zhvilluar me ta para disa ditësh një takim dhe i ka sqaruar mbi situatën. Konsulli shqiptar ka bërë të ditur në këtë takim se përkohësisht policia greke do të punojë bazuar në rregulloren e vjetër të pranimit të dokumenteve për të mos krijuar probleme dhe po punohet për arritjen e një zgjidhjeje afatgjatë të kësaj çështjeje. Pjesëmarrësit në protestë u shprehën për gazetarët se janë të zhgënjyer nga shteti shqiptar, që i ka lënë në harresë. Ata kritikuan qëndrimin e sotëm të konsullit dhe i bënë thirrje qeverisë shqiptare të zgjidhë përfundimisht këtë problem të emigrantëve në Greqi. Pas rreth 60 minutash protestuesit u larguan me premtimin se do të mblidhen sërish në një tubim të përmasave më të mëdha. Prej më shumë se një viti, shkrimi në shqip i toponimeve greke, në dokumenta, ka shkaktuar probleme për shumë familje shqiptare, fëmijët e të cilëve pengohen në dogana dhe kanë probleme për regjistrimin në shkollat greke. Ballkanweb.com
Comments
po greket,vendbanimet
<p>po greket,vendbanimet shqiptare i shkruajne shqip?</p><p>po kane gjetur merhumat e shtetit shqiptar e tallen.</p>
Add new comment