Buxheti në rrezik. BE, negociatorët nuk bien dakord

Bisedimet për të rënë dakord për buxhetin e Bashkimit Europian për vitin 2013 kanë dështuar pasi negociatorët e Be-së dhe shteteve anëtare nuk kanë arritur të bien dakort mbi subvencionimin shtesë. Komisioni i BE dhe Parlamenti Europian kishin kërkuar një rritje të buxhetit prej 6.8% në vitin 2013. Por shumica e qeverive duan të kufizojnë rritjen në vetëm 2.8%. Dështimi i bisedimeve ul shpresat për arritjen e një tjetër marrveshjeje kyçe, atë të buxhetit 2014-2020, që do të diskutohet më vonë këtë muaj.

Mosmarrveshjet kanë të bëjnë me një shtesë prej 9 miliardë euro në financime emergjence për të mbuluar buxhetin për arsimin, infrastrukturën dhe projektet kërkimore. Por Gjermania, Franca dhe qeveritë e tjera vunë në pikpyetje financimin në fjalë, dhe tetë orë bisedime nuk prodhuan asnjë marrëveshje. Ndër skemat të cilat përballen me një mungesë këtë vit është programi për shkëmbimet studentore Erasmus që u ka dhënë 3 milion të rinjve europianë mundësinë për të studiuar jashtë vendit, një program ky 25-vjeçar. Në një letër të hapur për krerët e BE të premten më shumë se 100 personalitete evropiane përfshirë regjizorë dhe futbollistë të famshëm, paralajmëruan se "mijëra të rinj mund të humbasin një përvojë që potencialisht do tu ndryshojë jetën".

Bisedimet e së premtes megjithatë garantuan vullnet politik për të siguruar 670 milionë euro për viktimat e tërmetit në Itali, por nuk ka marrëveshje se si do ta financojë atë, bënë të ditur burime nga Parlamenti Europian që shton se nëse marrveshja për buxhetin 2013 nuk arrihet në 21 ditët e ardhshme, Komisioni Evropian duhet të rishikojë propozimin për buxhetin. Samiti i BE që synon arritjen e një marrëveshje të tillë do të mbahet më 22- 23 nëntor.

Albanian Screen