Basha me zyrtarët gjermanë: Tirana më në fund me një plan rregullues

Kryetari i Bashkisë së Tiranës zhvilloi një takim me zotin Ernst Burgbacher, Sekretar Parlamentar i Shtetit në Ministrinë Federale të Ekonomisë dhe Teknologjisë në Gjermani dhe Hans-Jürgen Müller, President i Shoqatës Ekonomike gjermano-shqiptare.

Në këtë takim, Basha ka theksuar se zhvillimi ekonomik dhe punësimi janë prioritetet kryesore të Bashkisë së Tiranës. Një nga iniciativat e para të ndërmarra ishte heqja dhe reduktimi i 60 taksave dhe tarifave, hapja e sportelit unik për lejet dhe licencat, reduktimi nga 360 në 45 ditë i marrjes së një leje ndërtimi etj. Basha bëri të ditur se në buxhetin e saj, Bashkia e Tiranës ka parashikuar fondin prej 1 milionë dollarësh, për të garantuar kreditimin e sipërmarrësve të rinj në Tiranë.

Në këtë takim, kryebashkiaku Basha ka prezantuar projektet e zhvillimit të Tiranës, siç është plani i përgjithshëm rregullues, i cili i ka munguar qytetit për 23 vjet. Plani urbanistik krijon lehtësi, siguri dhe stabilitet për çdo investitor, pasi në mënyrë të qartë janë të parashikuara mundësitë që ofron Tirana.

Përmirësimi i klimës së biznesit dhe bërja e Tiranës, një qytet tërheqës për investitorët ka dhënë rezultatet e saj. Tirana ka fituar besimin e investitorëve të mëdhenj ndërkombëtarë dhe qeverive të ndryshme botërore, të cilat kanë mbështetur studimet dhe realizimin e një sërë projektesh strategjike si bulevardi i ri, terminali multimodal i pasagjerëve por edhe ndërtimi i linjave të tramit.

Projekti më i rëndësishëm i 70 viteve të fundit për Tiranën, zgjatimi i bulevardit të ri ka nisur të zbatohet tashmë. Ky projekt, produkt i një konkursi të gjerë ndërkombëtar, me pjesëmarrjen e studiove ndër më prestigjiozet në botë do të zhvillojë 1/5 e qytetit dhe do i japë një hov të ri zhvillimit ekonomik dhe punësimit.

Zoti Basha bëri të ditur se janë hapur bisedimet me kompani të interesuara, për të ndërtuar terminalin multimodal të pasagjerëve. Janë 25 kompani europiane që kanë shprehur interes për këtë projekt që do të realizohet me partneritetin publik privat. Po kështu, kompani prestigjioze ndërkombëtare si Korporata Shtetërore Kineze për Ndërtim dhe Projektim (China State Construction Engineering Corporation), kompania e tretë më e madhe në botë për ndërtime apo kompani franceze kanë shprehur interes për ndërtimin e linjave të tramit.

Kryetari i Bashkisë ka theksuar se investitorët gjermanë janë të mirëpritur, për tu bërë pjesë e zhvillimit historik të Tiranës. Sekretari Parlamentar i Shtetit në Ministrinë Federale të Ekonomisë dhe Teknologjisë, zoti Ernst Burgbacher ka vlerësuar vizionin e z.Basha dhe orientimin e saktë të prioriteteve për zhvillimin e Tiranës. “Këtë e dëshmon edhe aftësia për të thithur fonde ndërkombëtare dhe për të zbatuar projekte të suksesshme”, – deklaroi Burgbacher. Zoti Burgbacher e garantoi zotin Basha, për një bashkëpunim të ngushtë mes dy institucioneve.

Mapo