Anëtarët e Agimit të Artë shkatërrojnë tregun e emigrantëve

Në median greke është publikuar një video tronditëse, ku janë filmuar rreth 40 anëtarë të Agimit të Artë, mes të cilëve edhe deputetët e kësaj partie, Germeni dhe Iliopullos, të cilët kanë sulmuar shitësit e tregut të Rafinës, duke iu shkatërruar tezgat dhe mallin. 

Videoja u postua fillimisht në websiten e partisë Agimi i Artë dhe duket se është filmuar nga vetë anëtarët e saj. 

Në imazhe duken anëtarët dhe deputetët e Agimit të Artë, të cilët pak para sulmit kontrollojnë dokumentet e shitësve, për t’u siguruar mbi kombësinë dhe vlefshmërinë e dokumentave dhe pastaj sulmojnë dhunshëm duke shkatërruar tezgat e shitjes dhe mallin. 

Një nga deputetët tha para kameras: "Erdhëm në treg dhe pamë se ka shumë emigrantë pa dokumenta. Ne denoncuam në polici, por Agimi i Artë bëri atë që duhet bërë". Ai paralajmëroi se sulmet do të vazhdojnë në të gjithë Greqinë për të luftuar tregtinë e paligjshme, nëse strukturat shtetërore nuk ndërhyjnë. 

Lidhur me incidentin ka nisur një hetim paraprak, ndërkohë që një burim policor e vlerëson këtë aksion, të paligjshëm.

“Agimi i Artë” me qëndrimet e veta të theksuara ksenofobe dhe nacionaliste, është forca politike që hyri për herë të parë në Parlament në zgjedhjet e 17 Qershorit, por e vetmja që po njeh rritje të mbështetjes edhe pas zgjedhjeve. Sulmet e neonazistëve ndaj të huajve janë shtuar së tepërmi dhe janë bërë shumë shqetësuese, ndërkohë nuk ka asnjë të arrestuar prej tyre, lidhur me to.

Ballkanweb.com