100 vjet Pavarësi, “Meshari" i Buzukut në Biblotekën Kombëtare

Libri i parë shqiptar  "Meshari" i Gjon Buzukut u ekspozua pasditen e sotme në Biblotekën Kombëtare në Tiranë

Aurel Plasari drejtor i këtij institucioni, në fjalën hapëse të ceremonisë zyrtare falënderoi ministrinë e Kulturës që këmbënguli që ky libër të mbërrinte në atdhe me rastin e 100 vjetorit të Pavarësisë. 

“Ne sot kemi mundësinë të kemi në dorë Mesharin, kjo është liria dhe mundësia që krijon demokracia në Shqipëri. Dua të vecoj ministrin Bumci që nuk u kënaq që ta shikonte dhe prekte vetë, por ngulmoi që Meshari të vinte në Shqipëri në këtë 100 vjetor. Gjithashtu falënderoj edhe qeverinë. Zoti kryeministër biloteka është mirënjohëse që keni sjellë Mesharin”, tha Plasari. 

Kryeministri i vendit Sali Berisha duke falënderuar Vatikanin për rikthimin e kësaj vepre në Shqipëri, deklaroi se identiteti kombëtar ka si shtyllë kryesore gjuhën shqipe. 

“Tek ne identiteti kombëtar ka për shtyllë kryesore gjuhën e kombit. Sa më shumë ta studiojmë këtë gjuhë dhe të hulumtojmë për ecurinë aq më shumë do të kontribuojmë në njohjen me të mirë të identiteti kombëtar të kombit shqiptar”, theksoi Berisha duke vlerësuar si gjuhën më të bukur zyrtare, gjuhën liturgjike e cila ndër vite ka jetuar e syrgjynosur 

Libri i parë shqiptar që daton që në vitin 1555, "Meshari" i Gjon Buzukut, nën masa të rrepta sigurie, paraditen e së dielës "Meshari" mbërriti në kryeqytet për t'u bërë pjesë e festimeve që janë organizuar për 100-vjetorin e Pavarësisë. Pas kërkesës që qeveria shqiptare u bëri drejtuesve të Vatikanit rreth një viti më parë, më në fund u bë i mundur 'riatdhesimi' i kësaj vepre të rëndësisë së veçantë.