Fitore e protestës/20 ditë grevë në Athinë detyrojnë hapjen e hetimeve

20 ditë në grevë urie jashtë Parlamentit të Greqisë kanë detyruar Prokurorinë e Larisës të hapë hetimet për viktimat e aksidentit të trenit në Tempe duke kërkuar riverifikim toksikologjik për arsyen e vdekjes. Shkak: kërkesa e familjes shqiptare Ruci, kre i së cilës, Pano, është edhe protagonist i grevës.

Kërkesa për zhvarrim dhe rivlerësim toksikologjik është mohuar fillimisht, por mandej në media shpërthyen informacione se në një nga trenat e aksidentuar kishte ngarkesë toksike për në Ukrainë, diçka e paraportuar me gjasë nga qeveria greke.

Përmasat e skandalit duken pra qartë. Në sheshin pranë Parlamentit Rucin e ka takuar edhe kryepeshkopi i Greqisë, ndërkohë që ka patur një solidaritet masiv të përditshëm nga qytetarët. Përpjekja u shpërblye me një akt qytetari që gjeti jehonë. Kërkesa e Rucit është bashkuar me ato të familjeve Aslanidis, Karystianou dhe Konstantinidis.

Greva riafirmohet kështu si instrument efektiv presioni pozitiv mbi institucione që nuk duan të japin llogari. Protesta e dëshpëruar e një njeriu, gjeti jehonë në një shoqëri të tërë që beson se ka investuar në institucione për drejtësi, që dyshon në mënyrë intelektuale te pushteti dhe natyra e tij korruptive. Që këtej ndërgjegja për reagimin dhe mirëkuptimin e çështjeve.

Mirë apo keq, me probleme apo me probleme shumë, një shoqëri si ajo greke vepron në kuadrin e Fjalës dhe Arsyes për të mos lejuar degradimin që sjell përballja e pushtetit me individin. Aty është ligji, kur ai anashkalohet Pushteti duhet të Ndiejë se ka Përballë Shoqërinë! Ja pse plumbi merr përherë aktualitet në vendin tonë.

s.zaimi