Shërbëtori i Enverit: nuk dinte as të zbërthente revolen...

Nga biografia e re për Enver Hoxhën * e dr. Vasfi Barutit, Panorama sot ka shkëputur pjesën e marrëdhënies së tij me kunatin Bahri Omarin, që Enveri e dënoi personalisht me bashkëpunim.

Vetë Enver Hoxha kishte firmosur për pushkatimin e kunatit, edhe pse motra e tij, Fahrija, i ishte lutur dhe kishte qarë për ta falur. Një rrëfim i tillë është lënë me shkrim në ditar edhe nga vetë Bedri Spahiu, i cili ka qenë prokurori i çështjes dhe që më vonë u burgos nga regjimi. Megjithatë, pak dihet rreth marrëdhënieve të hershme të Enver Hoxhës dhe Bahri Omarit, që siç duket kanë degjeneruar në hakmarrje brenda familjes.

Ja se ç’dëshmi jep Themistokli Pano, shërbëtori i Bahri Omarit, por që i shërbente dhe Enverit:

“ [Enveri] një herë tjetër më dha t’i pastroja revolen. Unë i thashë që ta zbërthente se nuk dija dhe më pa me shumë inat, sa e kuptova se edhe ai vetë nuk dinte ta bënte zbërthimin… Isha në katin e dytë për t’i dhënë Enverit diçka që më kishte porositur ta blija dhe dëgjoj të thirrura të forta ‘Qërohu! Qërohu!’ e nga dera e përplasur prej tij doli Fahrija duke qarë.”

Në një letër të Enverit, ai i referohet Bahriut si “atij m…”

“Fahrijen piqe te ne, atij m… mos ia shif sytë. Mos kurseni gjë kundër tij gjoja se është kunati i emë, ai është tradhtar” shkruan Enveri.

k.c.