Shënim: Ngrohtësia turke e Ramës, një zgjidhje për krizën që e pret qeverinë

Energji, shëndetësi, turizëm dhe infrastrukturë. Këto ishin temat e bisedimeve mes delegacionit shqiptar të kryesuar nga kryeministri i ardhshëm Edi Rama, dhe palës turke me kryeministrin Erdogan. Vizita dyditore në Stamboll, ku Rama kishte me vete disa prej ministrave (gjithashtu të ardhshëm), duhet thënë se ka diçka jashtë të zakonshmes. Vetë termat “marrëdhënie strategjike”, “nisja e një bashkëpunim intensiv të panjohur më parë”, etj, dëshmojnë se qeveria e re e ka zgjedhur ndërkaq partnerin e bashkëpunimit ekonomik, teksa BE ende nuk po del nga kriza ndërsa parametrat ekonomike shqiptare janë shumë shqetësues. “Ne e konsiderojmë Turqinë një partner strategjik dhe ne kemi vlerësuar se ky partneritet ka një potencial të jashtëzakonshëm e të pashfrytëzuar dhe jemi të bindur se në katër vitet e ardhshme do bëjmë të mundura gjëra të cilat fatkeqësisht në të shkuarën nuk janë bërë dot të mundura”, është një paragraf kuptimplot nga prononcimi i Ramës.

A.K