Lotaria, Theçeri dhe "mirëqeverisja në funksion të publikut" që paska ende shpresë

Edi Rama i është vërsulur edhe një herë tjetër kësaj punës së lotarisë, në një intervistë sot në TCH: “Unë dua ta bëj shumë të qartë që ne nuk do ta njohim këtë lotari kombëtare dhe ne do ia kthejmë publikut këtë të drejtë duke e vënë lotarinë kombëtare në dispozicion të interesit publik. Është publiku që përmes shtetit duhet të përfitojë përqindjen e përmbysur të asaj që shprehu Ministri i Financave. Pra jo 10% për shtetin dhe 90% për privatizuesit, por 90, 85, 80% në rastin më të ulët për shtetin dhe pjesa tjetër për gjithë anën e operimit, - tha i pari i socialistëve.

Dhe pastaj përmendi Theçerin (në foto me Reganin, një tjetër emër që del shpesh në "përplasjet ekonomike në distancë" Berishë-Ramë): "Kryeministrja Thatcher në Angli kur futi lotarinë kombëtare, e ktheu në një mekanizëm për nxitjen e arteve, sporteve dhe të politikave sociale. Ndërsa logjika që ka udhëhequr këtë tender është logjika e grabitjes së një të drejte të publikut në favor të një klientele të pushtetit".

Dhe Rama e mbyll me një stërlakim tipik të termit 'grabitje' :  "...Ajo çka i sugjeroj këtyre zotërinjve, që po shkojnë nga grabitja në grabitje dhe pasi kanë grabitur e vazhdojnë të grabisin pasuritë e patundshme, kanë hyrë në fushën e  grabitjeve të të drejtave të publikut është që të mbajmë në konsideratë praktikat më të mira europiane, të mos harrojmë për asnjë moment që aty janë për të mirëqeverisur në funksion të publikut...”. Bukur, besa. Dmth, megjithëse "kanë grabitur e vazhdojnë të grabisin" kanë ende kohë t'i thërrasin mendjes. Po i thirrën, Rama do t'i falë... (A.N.)