Kësi pisllëqesh...

Në 30 qershor, ditën e provimit të maturës,  - me titullin "O Zot çfarë pyetje" - ResPublica botoi foton që shoqëron këtë shënim dhe tekstin e mesazhit të një maturanti në Facebook (e gjeni këtu: http://www.respublica.al/node/14570). Kemi shkruar atë pasdite: "…Shikojeni këtë mesazh në Facebook të një maturanti: “Njerëz jam n’provim. M’ndihmon dot njeri me këtë pyetjen: renditni 3 arritjet e qeverisë shqiptare të cilat çuan në liberalizimin e vizave për Shqipërinë”  Boohhh...  No Comment!...".

Të nesërmen lajmi ishte edhe në disa gazeta por nuk pati shumë jehonë, ndoshta për shkak të ngarkesave të tjera që mori matura shtetërore si arrestimi i 4 mësueseve në Kamëz, akuzat për kopjime masive, etj. Por ky mesazh ka ngacmuar këto ditë (thuajse dy javë më pas) deputeten Shamku dhe publicistin Ardian Vehbiu. Shamku mbajti një fjalim në seancën e fundit kuvendore ku (pasi lexoi këtë "pyetje" për maturantët), tha: "Sigurisht nxënësit nuk ditën t’u përgjigjeshin, për t’iu përgjigjur, nuk duhet të studionin, por duhet të kishin konspektuar fjalimet e shokut Sali…".

Kurse Ardian Vehbiu dje në blogun e tij "Peizazhe të Fjalës", shkruante: "…Nuk di, as arrij të përfytyroj, se çfarë lidhje mund të ketë matura, si moment kritik në zhvillimin e të riut, me “tri arritje të qeverisë”, të cilat paskan sjellë liberalizimin e vizave. Lexojeni edhe një herë: pyeten maturantët për arritjet e qeverisë, dhe jo thjesht për arritjet, por për tri arritjet, që është frazeologji kineze, ose kinezëri e kohës së dymbëdhjetë fitoreve dhe gjashtë dhëmbëve të gjarprit, shtatë gabimeve të Konfucit dhe pesë rrëshqitjeve ideologjike të kuzhinierit të Lin Biaos. Lexojeni edhe një herë: pyeten studentët jo për liberalizimin e vizave, po për arritjet e qeverisë që çuan në liberalizimin e vizave; të thuash se maturantëve tash e tutje nuk u mbetet veçse të fillojnë të udhëtojnë nëpër Europë, duke mbajtur librin me citate të vendimeve qeverisë në xhep e duke ua lëvduar të huajve. Lexojeni edhe një herë: pyetja i merr të mirëqena arritjet e qeverisë; ose bindjen se kjo qeveri ka pasur arritje – a thua se matura konsiston në sensibilizimin e të rinjve, ndaj arritjeve të qeverisë; jo në edukimin e tyre me sens kritik, ndër të tjera, edhe ndaj qeverive që vijnë dhe ikin. Kësi pisllëqesh unë s’mbaj mend t’i kem studiuar as në maturën time, të fjalimeve të Plenumeve famëkeqe; sepse edhe atëherë, kur nuk lihej vepër e Enver Hoxhës pa konspektuar, ruhej një farë distance kohore nga vendimet politike, për t’i lejuar, si të thuash, të fermentoheshin…" (A.N.)