Gjinushi i vë Ramës kufirin te thana – po hyri Meta në koalicionin e majtë, del ai

Në një intervistë të gjatë dhënë gazetës Mapo, Skënder Gjinushi ka lëshuar batare të panumërta kundër PS-së dhe Edi Ramës në lidhje me reformën zgjedhore. Dhe kur pyetet nëse partia e tij do të mbetet pjesë e koalicionit të së majtës, nëse LSI-ja bëhet pjesë e tij, ai përgjigjet: “Absolutisht jo”. Aktualisht, në koalicionin opozitar, PSD-ja është partia e dytë me më shumë vota në zgjedhjet parlamentare. Dhe partia e dytë ka shanse të marrë mandat prej votave të partive më të vogla të koalicionit.

Më tej në intervistë, Gjinushi shprehet edhe kundër një koalicioni paraelektoral me AK-në e Spahiut dhe FRD-në e Topit. Ndërsa për partinë e tij thotë se do të garojë së bashku me PDS-në dhe PSV91-shin, por paralel me PS-në dhe jo bashkë me të.

Le ta përmbledhim pak tablonë e garës elektorale që do të dëshironte Gjinushi.

Nga njëra anë duhet të jetë koalicioni PD-LSI me nja 17 vagonë të vegjël nga mbrapa, ndërsa në anën tjetër duhet të garojnë veçmas njëra-tjetrës këto koalicione: PS-G99, PSD-PDS-PSV91, AK-FRD.

Siç duket Gjinushi nuk e kujton filmin Skëndërbeu, në të cilin tregohet ajo legjenda per forcën e shkopijve të mbledhur tufë, krahasuar me dobësinë e tyre një nga një. Ose e mban mend, por i bën presion Edi Ramës për një marrëveshje sa më të mirë parazgjedhore. Në 2009-ën, PSD-ja mori 26 mijë vota në rang kombëtar, por nuk fitoi dot asnjë mandat.

E.Zaloshnja