Elisa bën prapa-kthehu: Partinë e kemi të fortë!

Socialistja e re Elisa ka bërë sot një si prapa-kthehu pas veprimit në dukje nervoz të mbrëmjes së djeshme, kur u largua në mënyrë demonstrative nga salla e Asamblesë së FRESSH-it. Dje u fol për manipulim listash (dmth Spiropalit nuk i kishin marë mendje për dy-tre lëvizje emrash në FRESSH që sipas disa gazetave i ka bërë Erjon Veliaj) por sot u fol për disa "shqetësime organizative".  Në një deklaratë për mediat, kryetarja e organizatës rinore të PS-së (në foto gjatë daljes për mediat sot), me një stil po aq të zjarrtë sa dhe veprimi i saj i një dite më parë, mes të tjerash tha: 

"Jam shumë e keqardhur për deformimin skandaloz që i është bërë dashakeqësisht në një sërë mediash një çështjeje të brendshme organizative të FRESSH-it. Pas një pune të jashtëzakonshme gjashtë mujore dhe një fushate të shkëlqyer për nga modeli i ri që FRESSH-i ofroi në sytë e të gjithë shqiptarëve, na u desh të zgjidhim dje një problem thjesht organizativ dhe tanimë e kemi zgjidhur... FRESSH-i është një organizëm i gjallë ku kanë vërshuar të reja e të rinj nga të gjithë anët e Shqipërisë"... etj, etj. Dhe e mbyll me fjalët: "Kjo është liria dhe demokracia sipas nesh ... Regjimit të errësirës që kemi përballë do t’i qëndrojmë përballë të bashkuar fort me njëri-tjetrin". Mirë do bënit... (A.N.)