Burgaj: Po përgatitim operacionin për të ndërhyrë në Lazarat!!!

Drejtori i Përgjithshëm i Policisë së Shtetit, Hysni Burgaj, po shfaqet gjatë këtyre orëve në media, duke u ngrefosur mbi një plan masash operacionale për të hyrë në Lazarat. “Është rrethuar Lazarati”, gjëmon media që i mban ison policisë lidhur me këtë çështje. Dhe pakkush pyet: Po pse erdhën punët kështu, që policia të na shesë si sukses rrethimin e Lazaratit?

Më poshtë është një intervistë e Burgajt dhënë gazetarit të Mapo-s, Bledar Shehu. Burgaj flet sikur Lazarati të jetë “tokë magjistricash, demonësh, vampirësh, etj, ku askush s’ka guxuar të vërë këmbë deri më sot”. “Ju garantoj që do të ndërhyjmë në Lazarat”, thotë ai. Vini re! Nuk thotë ‘hyjmë’, por ‘ndërhyjmë’. Shqipe allasoj.

Çfarë masash ka marrë aktualisht policia për goditjen e trafikimit dhe kultivimit të bimëve narkotike?

Mund të them që në fillim, ndryshe nga vitet e tjera, Policia e Shtetit këtë vit ka marrë masa shumë të rrepta në luftë kundër trafikimit të drogës dhe jo vetëm kanabis-sativa por edhe të drogave të forta. Kjo ka ardhur si rezultat i intensifikimit të masave të gjithanshme të Policisë së Shtetit me mjete speciale të hetimit, trajnime të vazhdueshme brenda dhe jashtë vendit të oficerëve të policisë, teknologjisë së përparuar. Në qoftë se do të flisja me shifra, mund të them që janë pesëfishuar goditjet e policisë krahasuar me vitet e mëparshme. Ju siguroj që prodhimi ka qenë i njëjtë, madje mund të them se numri i bimëve në territorin e Shqipërisë krahasuar me vitet e mëparshme ka qenë 50% më i ulët, por me masat e marra nga policia janë goditjet shumë herë më të mëdha. Dhe ne nuk do të rreshtim së godituri këtë fenomen. Një ndër prioritetet e punës së policisë për këtë vit është që të parandalojë që në embrion, që në fillim, kultivimin e bimëve narkotike. Shpresoj që me masat e marra, me marrëveshjen e lidhur edhe me policinë italiane, së shpejti do të kemi inspektim me avion në gjithë territorin e vendit për të përcaktuar në detaje me koordinata shumë të sakta se ku dhe sa kultivim ka në territorin e vendit.

Zona e Lazaratit vazhdon të konsiderohet një pikë e nxehtë në këtë drejtim. A do të ndërhyjë policia në këtë fshat ?

Ne po përgatitemi dhe mund t’ju garantoj për këtë, që në bashkëpunim dhe me komunitetin e Lazaratit, ne do të kemi së shpejti ndërhyrje edhe në gjithë tokat publike, në gjithë territorin e Lazaratit. Në vazhdojmë të ushtrojmë kontrolle jo vetëm në aksin kryesor që të çon në këtë fshat, por kemi marrë masa në gjithë hapësirën ku mund të kalojnë ngarkesat me lëndë narkotike, qoftë në goditje që kemi konstatuar me kafshë apo edhe me mjete të tjera. Shpresoj që tre skalione të forcave të policisë, por jo vetëm skalionet e forcave të koordinuara të policisë, po edhe krimi i organizuar po bën punën e vet me qëllim që ne të jemi sa më pak shqetësues për vendet fqinje, si Greqi e Itali. Goditjet e fundit të ndërmarra, besoj se janë një tregues shumë pozitiv dhe mendoj se ne do ta arrijmë këtë.

Re.Pu.