Qeveria e re do të shkrijë agjencitë sekrete paralele
Mazhoranca e re parlamentare pritet të nisë së shpejti një reformë të thellë në fushën e shërbimeve sekrete në vend, duke eliminuar një numër të konsiderueshëm agjencish, të cilat kanë krijuar një panoramë amullie të kompetencave dhe ndërveprimit ndaj qytetarëve, raporton e përditshmja Shqip.
Burime brenda mazhorancës bëjnë të ditur për këtë gazetës se menjëherë pas konstituimit të Kuvendit të ri, në ditët e para të shtatorit, Komisioni për Sigurinë Kombëtare pritet të rinisë punën e Kontrollit civil të agjencive të inteligjencës, duke nisur një reformë të thellë.
Siç mësohet, do të eliminohen strukturat inteligjente në Ministrinë e Financave, do të reformohet thellësisht Shërbimi Informativ i Ushtrisë dhe Shërbimi i Kontrollit të Brendshëm në polici.
Konkretisht, do të ndalohet përgjimi i qytetarëve nga ana e agjencive inteligjente, duke bërë që në Shqipëri të ketë vetëm një shërbim sekret, që është Shërbimi Informativ Shtetëror, SHISH.
Reforma pritet të propozohet edhe nga ana e qeverisë së re, menjëherë pas nisjes së punës, pas transparencës së thellë në veprimtarinë e punës që kanë kryer në të kaluarën strukturat që janë akuzuar nga opozita e mëparshme dhe opinioni publik për shkelje të të drejtave të njeriut.
Ndërkaq, një reformë strukturale pritet të pësojë edhe Shërbimi Informativ Shtetëror, i cili pritet të ulë numrin e punonjësve dhe modernizimin e strukturave të saj.
Tema
Add new comment