Kolegji pushon hetimet për Shkodrën, PS kërkon rivotim në Lezhë
Kolegji Zgjedhor pranoi sot kërkesën e Partisë Socialiste për pushimin e hetimeve lidhur me çështjen e qarkut të Shkodrës.
Gjatë një daljeje për mediat, përfaqësuesi i PS-së, Koli Bele, tha se KQZ-ja e ka përfunduar tashmë rinumërimin e votave për Shkodrën dhe se ankesa e partisë që ai përfaqëson, tashmë do t’i referohet procedurës së KQZ-së dhe jo tabelave përmbledhëse.
“Iu drejtuam kolegjit, pasi KQZ-ja mori vendim të kundërligjshëm si për qarkun e Shkodrës dhe atë të Lezhës. Një nga arsyetimet ishte edhe vonesa në daljen e rezultatit përfundimtar.
Nuk ia vlente ta vazhdonim, se ne si PS s’kemi pasur probleme me hapjen e kutive”, tha Bele. Gjithashtu, ai shtoi se PS-ja do të kërkojë edhe pavlefshmëri për procesin zgjedhor të qarkut të Lezhës.
Ndërkohë Kolegji pritet që sot në orën 16:00 të japë vendimin në lidhje me provat e paraqitura nga LSI-ja për qarkun e Kukësit, nga ku kjo forcë politike pretendon të marrë një mandat.
Dy ditë më parë kolegji pranoi provë materiale filmike dhe vendosi që akti i ekspertimit të bëhet nga dy ekspertë të caktuar nga 2 forcat politike të interesuara, përkatësisht LSI-së dhe PD-së. LSI caktoi Ardian Pollon ndërsa Partia Demokratike Zamir Hoxhën.
KQZ-ja mbrohet: Hetimet i shërbyen transparencës
KQZ-ja mbajti ditën e sotme një deklaratë për mediat nga ku tha se hetimet për Lezhën dhe Shkodrën i shërbyen transparencës. Përmes zëdhënëses, Drilona Hoxhajt, KQZ-ja theksoi se veprimtaria e saj ka qenë në përputhje me Kodin Zgjedhor.
"Ndërmarrja e thellimit të hetimit administrativ dha impakt jo vetëm sa i përket transparencës dhe besueshmërisë së procesit, por mbi të gjitha provoi se në zbatim korrekt të ligjit, çdo manipulim i rezultateve të zgjedhjeve dhe vullnetit të shqiptarëve të shprehur me votë, evidentohet dhe do të marrë ndëshkimin ligjor të merituar", deklaroi për mediat zëdhënësja e KQZ-së, Drilona Hoxhaj.
KQZ përmbylli dje shqyrtimin administrativ të 41 ankimeve paszgjedhore të paraqitura nga subjektet zgjedhore, të cilat i shqyrtoi rast pas rasti, duke rrëzuar plotësisht 33 prej tyre.
"Vetëm për dy zona zgjedhore, KQZ nuk u kufizua në objektin e kërkimit, konkretisht për qarkun Lezhë dhe për qarkun Shkodër, ku provat e administruara gjatë hetimit i shërbyen KQZ-së, si indicie për thellimin e hetimit administrativ", tha zëdhënësja.
SHEKULLI
Add new comment