SHBA dhe Britania i kërkojnë Hamasit të pranojë armëpushimin

Hamasit i është propozuar një marrëveshje, ndërsa pritet raundi i ri i bisedimeve në Kajro, me ndërmjetësimin e Egjiptit dhe Katarit.   

Në këmbim të lirimit të pengjeve izraelite, Hamasit i është ofruar armëpushim 40-ditor dhe lirimi i "mundësisht mijëra" të burgosurve palestinezë.

Detajet e propozimit i bëri të ditur sekretari i Jashtëm britanik, David Cameron.

Grupit militant palestinez i është dhënë "një ofertë shumë bujare e armëpushimit të qëndrueshëm 40 ditë, lirimin e potencialisht mijëra të burgosurve palestinezë, në këmbim të lirimit të këtyre pengjeve", tha Cameron në një takim të Forumit Ekonomik Botëror në Riad.

"Shpresoj që Hamasi ta pranojë këtë marrëveshje dhe sinqerisht, i gjithë presioni në botë dhe të gjithë sytë e botës duhet të jenë tek ata sot për t’u thënë “Pranojeni”", shtoi Cameron.

Edhe Sekretari amerikan i Shtetit, Antony Blinken, tha se shpreson që Hamasi ta pranojë propozimin.

Egjipti, Katari dhe SHBA po punojnë për të ndërmjetësuar një marrëveshje midis Izraelit dhe Hamasit prej disa muajsh.

Të paktën 34 488 njerëz janë vrarë dhe 77 643 të tjerë janë plagosur në sulmin izraelit në Gaza që nga 7 tetori, sipas autoriteteve palestineze në territorin e rrethuar.

Izraeli filloi luftën e tij në Gaza pasi luftëtarët e Hamasit udhëhoqën një sulm në Izraelin jugor më 7 tetor, duke vrarë të paktën 1 139 njerëz, sipas raportimeve të Al Jazeera bazuar në statistikat zyrtare izraelite, dhe duke kapur rreth 250 të tjerë peng.

Dhjetëra pengje u liruan nga grupet palestineze në Gaza në këmbim të qindra të burgosurve palestinezë të mbajtur në burgjet izraelite gjatë një armëpushimi njëjavor të kaluar në fund të nëntorit.