Rajoni duhet ta mbajë larg këtë Kripën!

Burime nga Brukseli pohojnë tani se Rama ka qenë në kontakt të vazhdueshëm me të gjitha palët e përfshira, europianët, amerikanët e serbët. Sipas tyre, kreu i ekzekutivit shqiptar ka ushtruar influencën e tij për lirimin e Rifat Zekës, Beqir Sefit dhe Mustafë Shemit, jo vetëm drejtpërdrejte me presidentin serb Aleksandër Vuçiç duke e pohuar edhe publikisht se çdo nisme rajonale do të kthehej në zero nëse policët nuk liroheshin, por edhe duke shfrytëzuar lidhjet e ngushta të Vuçiçit me kryeministrin hungarez Viktor Orban, i cili pak ditë më parë vizitoi Tiranën dhe njihet për marrëdhëniet e ngushta miqësore me kreun e shtetit serb.

Mësohet se ai është nxitur nga Rama për t`u bërë pjesë e negocimit me Vuçiçin

Ky paragraf shërbehet nga Top-Channel, i cili përcjell këtu një merak prej cinguni të z. Rama që do të vjedhë sa të mundet fitore publicitare pasi krijoi keqkuptime të mëdha në Kosovë me vendimet e veta dhe qëndrimet prej moralisti dhe pacifisti.

Askush nuk po e përmend Edi Ramën për rolin e tij në këtë lloj negociate për lirimin e tre policëve. Presidentja e Kosovës, Osmani falenderoi në mënyrë të posaçme SHBA-të ndërkohë që Orban shkruajti në tuiter se kishte kërkuar në Beograd që policët të lirohen.

Rrëmbimi i tre policëve të Kosovës ishte një dhuratë për z. Rama që të mund të gjente një alibi për qëndrimet e veta kritike ndaj Serbisë të cilën e sheh si aktorin strategjik për paqen rajonale dhe rolin e Shqipërisë në një kontekst të ri ekuilibri. Z. Rama po do të shfaqet si zëri i arsyes në një rajon që përjeton disa tensione dhe në nxitimin e paduruar për të promovuar iluminimin e vet hyn në një derë e ulet në një tryezë ku nuk e fton kush. Drafti I tij për Asocacionin ishte asgjë më shumë sesa kupë helmi në kontekstin kur u propozua. Asgjë e qartë dhe e kuptueshme në të gjitha ditët e tensionit, veç sulmit ndaj kryeministrit të Kosovës të cilin edhe sot e akuzon se po izolon Kosovën.

Tashmë përvoja i mëson të gjithë se kudo dhe kurdoherë që është i pranishëm ky njeri, diçka do shkojë keq, sepse nuk ka asgjë parimore në qasjen e vet. Është një dikush që synon të begeniset si zgjidhje dhe “mendje”, ndonëse mendja do e kërkonte që të mbante pak profil më të ulët sepse është në krye të një vendi të dështuar që nuk e përfill kush veç për lajmet me krim e trafiqe. Si supersticioz që thuhet se është, meriton të vihet në dukje apeli për ta mbajtur larg me një thënie nga Jugu: Larg këtë Kripën!

s.zaimi