Slideri Kryesor

Qeveria ka dërguar Blendi Klosin, ministër për Çështjet Sociale, për të biseduar me banorët e Dhërmiut, rreth ndërtimit të Kishës së re të Shën Thanasit. "A1 Report" publikon madje edhe projektin e ri që ndryshon në pikëpamje arkitektonike nga projekti i vjetër i para 1972-it. Do të ishte interesante të bëhej i njohur emri i arkitektit që ka sugjeruar projektin. Por le të shohim çfarë ka thënë ministri Klosi: “Nuk pati asnjë incident nga ato që ju gazetarët zakonisht prisni.

“Deutsche Welle” bën sot një përmbledhje të shtypit gjerman mbi samitin e Vjenës. E nga sa mund të lexohet, mediat gjermane janë më të sinqerta nga politika e Berlinit zyrtar, që sipas tyre ka ndërmarrë një iniciativë tek e cila nuk beson. “Nën titullin "Loja e gabuar për Ballkanin Perëndimor", gazeta “Berliner Zeitung” komenton: "Gjatë konferencës plasi lajmi për gjetjen e një kamioni plot me refugjatë të vdekur. Lajmi horror nuk hodhi hijen mbi konferencën, siç po lexojmë rëndom, por ai hedh një dritë të fortë në mugëtirën politike që mbizotëronte takimin pompoz në Vjenë.

Zyra Federale Gjermane për Azilin dhe Migracionin (BAMF) në një prononcim për "Abc News" deklaroi se kjo zyrë nuk ka asnjë indikacion se azilkërkuesit nga Shqipëria janë emigrantë nga Greqia. BAMF reagoi në lidhjen me deklaratën e Edi Ramës, i cili tha se “është fakt që dihet tanimë dhe nga autoritetet atje se shumica dërrmuese e shqiptarëve s'janë të ikur nga Shqipëria po nga Greqia.” Por sipas Zyrës Federale Gjermane për Azilin dhe Migracionin, që është dhe autoriteti kryesor për azilkërkuesit, nuk ka asnjë shenjë se shumica e azilkërkuesve shqiptarë janë ish-emigrantë nga Greqia.

Muaji korrik ka shënuar bilancin më negativ në tregëtinë me jashtë përgjatë viteve të fundit. Të dhënat e INSTAT tregojnë se deficiti tregtar i këtij muaji është 30 mld lekë, duke u rritur me 23,0 % krahasuar me Korrik 2014 dhe 20,3 % në krahasim me Qershor 2015.
Në korrik eksportet e mallrave arritën vlerën 22 mld lekë, duke u ulur me 2,6 % në krahasim me një vit më parë dhe 7,6 % në krahasim me Qershor 2015. Importet e mallrave në korrik të këtij viti arritën vlerën 52 mld lekë, duke u rritur me 10,6 % në krahasim me Korrik 2014 dhe 6,5 % në krahasim me Qershor 2015.

Prodhuesi shtetëror i energjisë, Koorporata Elektroenergjetike Shqiptare (KESH) ka shënuar një ecuri mjaft negative në vitin 2014, sipas të dhënave të publikuara në bilancin e saj. “Monitor” bën të ditur se të ardhurat e kompanisë ranë ndjeshëm me 45%, duke zbritur në 16 miliardë lekë (115 milionë euro), nga 29.2 miliardë lekë (209 milionë euro), që ishin në 2013-n. Sipas “Monitor” vetëm nga shitja e energjisë elektrike, të ardhurat ranë nga rreth 25 miliardë lekë, në rreth 11 miliardë lekë në 2014-n.

Një tjetër tragjedi ka ndodhur në Mesdhe ku vala me emigrantë që përpiqen të arrijnë Europën nuk duket se mbaron. Mediat raportojnë se dy barka me rreth 500 imigrantë janë zhdukur në brigjet afër qytetit të Zuwaras në Libi. Në barkën e parë ndodheshin 50 persona, kurse në të dytën rreth 500. Raportohet se 201 persona janë shpëtuar nga Roja Bregdetare libiane, ndërsa një qendër në Sabratha afër Tripolit priti 147 njerëz. Nuk ka ende një bilanc për viktimat në këtë rast, që i shtohet serisë së pafundme të rasteve të tilla në Mesdhe.

Samiti i Vjenës u mbyll dhe me nga sa po raportohet Shqipëria nuk është se ka përfituar ndonjë gjë. Këtu nuk është fjala për ta parë ndihmën si një thes me para, por për të kuptuar se çfarë konkretisht do të financohet për projektet shqiptare. Ministri i Ekonomisë, Ahmetaj, foli për propozimin e Korridorit të Kaltër, por asgjë më tej. Po kështu,mreferohen burime për një lloj përplasjeje mes kryeministrit shqiptar she Johanes Hahn, teksa ky i fundit ka deklaruar se “BE-ja nuk duhet parë si bankomat”.

Mbaroi edhe Samiti i Vienës. Takimi nuk përmbushi asnjë nga pritshmëritë e propaganduara për një plan të rimëkëmbjes ekonomike të Ballkanit dhe mbështetjes politike për integrimin në Bashkimin Europian.
Deklarata e përbashkët e përcjellë në shqip nga zyra për shtyp e kryeministrit Edi Rama nuk përmban asnjë plan konkret për investime në infrastrukturë apo sektorë prioritarë që do t'i jepnin një fuqi ekonomike tregut rajonal, por shpreh angazhimin e qeverive të rajonit dhe kryeministrave të vendeve të Ballkanit për të mbështetur bashkëpunimin rinor.

Në Bashkimin Europian çdo vendimmarrje niset nga premisa politike. Kriteret me sa duket janë jo rrallë një formalitet që kapërcehet. P.sh presidenti i Komisionit Europian, Jean Claude Juncker deklaroi në një konferencë të përbashkët me presidentin ukrainas, Petro Poroshenko, se “nisur nga progresi i realizuar në Ukrainë, unë nuk dyshoj për asnjë sekondë se vendet anëtare do të arpovojnë lëvizjen pa viza për qytetarët ukrainas”. E ka përforcuar këtë qëndrim edhe Presidenti i Këshillit Europian, polaku Donald Tusk.

Para pak ditësh kryeministri shqiptar, duke iu përgjigjur pyetjeve për numrin në rritje të azilkërkuesve nga Shqipëria theksoi se shumica dërrmuese e shqiptarëve s'janë të ikur nga Shqipëria po nga Greqia! "Është fakt që dihet tanimë dhe nga autoritetet atje se shumica e shqiptareve që ikin në Gjermani janë shqiptarë që ikin kryesisht nga Greqia po jo vetëm. Sigurisht dhe nga këtu"- deklaroi Rama duke përmbledhur shkurt në një fjali problematikën e largimit të shqiptarëve, pa dhënë fakte e shifra që mund ta bëjnë të vlefshëm këtë argument të tij.