Blloku Të Kripura

Mirëmëngjes! 

Sot është dita e 22-të që nga tërmeti i 26 nëntorit. Rituali është kthyer. Edhe për ata që jetojnë në çadra. Ha bukë, fle, çohesh, lan dhëmbët, dëgjon muzikë, nisesh për punë. 

Lajmet mos i harro! Çfarë ka ndodhur sot? Ja ta hap pak cel apo radion në makinë. Pret të dëgjosh se çfarë është bërë. Fundja kjo ka rëndësi. 

Kryeministri është shfaqur në një takim në mbrëmjen e djeshme duke u treguar gishtin e mesit disa të rinjve që po bënin thirrje kundër tij. I rrethuar nga fëmijë zoti Rama ngre gishtin për t’u shfaqur ashtu siç është: një politikan, qytetar, apo edhe në probabilitetin e pagjasë, një artist i padomestikuar.

Redaksia e “Të Kripura” ka arritur të shohë një shkëmbim mesazhesh mes kryeministrit Edi Rama dhe djalit të miliarderit Xhorxh Soros, Alex. Pasi ky i fundit i shpreh keqardhjen dhe solidaritetin z. Rama i garanton mbështetjen për lehtësimin e pasojave të tërmetit, vijon përgjigja e z. Rama me fjalët: Lot…

I dashur Alex! 

Gafë apo e qëllimshme, kjo mbetet e paqartë. Por avioni i Air Albania, që u shpall se u mbiquajt Lasgushi, në fakt është shënuar si Vangjushi.

ResPublica sjell fotot që dëshmojnë këtë tjetërsim i cili nuk kuptohet mirë se përse është bërë. E sigurtë është se avionit nuk i ndalohet hyrja në Europë, por sipas disa burimeve ai mund të tentojë edhe uljen në SHBA. Me këtë rast, mendohet që hyrja e tij në territorin amerikan të provojë se SHBA nuk kanë asgjë me Vangjush Dakon.

Shumëkush qeshi sot me presidentin e vendit, Ilir Meta, i cili u shfaq duke bërë sikur luan futboll në plazh. Si një personazh publik të cilit nuk i shkon asgjë, jashtë sportit të intrigave të kafenesë, Meta, tërësisht demode dhe i pamenaxhueshëm nga praktika e PR-it, nuk po arrin të kuptojë se ngjan mirë kur nuk flet. Por nëse ky i presidentit është një episod që në fund të fundit bën pjesë në kazanin e politikës shqiptare, episode të tjera, “nga bota akademike”, të bëjnë të qeshësh dhe të qash në të njëjtën kohë.

Sot bota, ajo e vjetra, ajo e demagogjisë, hipokrizisë, ngjan se është ndërsyer si kurrë më parë kundër dy liderëve të fundit të sinqertë: presidentit amerikan Donald Trump dhe Ilir Meta. Të sinqertë sepse këta zotërinj nuk i merr dot për gjë tjetër veç asaj që janë. Dhe mesa duket as nuk thonë dot gjë përtej asaj që përcjellin me pamjen e tyre.

Falja publike që deputeti Myslim Murrizi ka kërkuar për fyerjen ndaj personave me sindromën daun ka vënë në lëvizje kërkesën për shkarkimin e Avokatit të Popullit, Erinda Ballanca. 

Kërkesa drejtuar Parlamentit është bërë nga Shoqata e Thuthuqëve Autoktonë, që pretendojnë se ky institucion nuk reagoi ndaj kryeministrit Edi Rama për talljen dhe fyerjen që ky i fundit i bëri deputetit Edi Paloka për cenin fizik në të folur. Pra për thuthuqërinë e tij. 

Afrimi i muajit shtator dhe aktivizimi i SPAK-ut, pritet të sjellë prangosjet e para në nivel të lartë politik. Në këtë kuadër, Partia Socialiste po bën përgatitjet e veta duke marrë parasysh se disa prej njerëzve të saj do të futen në qyp.

Në një letër që sekretari i Përgjithshëm, Taulant Balla, i dërgon kryesisë së partisë, rekomandohen kurse intensive psikologjike për njerëz që mund të bien në rrjetën e SPAK-ut. Në kuadër të këtyre kurseve është përfshirë një seri aktivitetesh dhe mësimesh mes të cilave edhe loja e yçit, e cila mund të luhet lirshëm në burg.

Deri sot veshët e qytetarëve shqiptarë kishin dëgjuar fjalën koncesion të përsëritej papushim thuajse për çdo shërbim publik. Por koncesion brenda koncesionit është ndoshta hera e parë.

Është fjala për shërbimin e transportit të brendshëm në aeroportin e Rinasit që çon pasagjerët nga avioni në terminal dhe anasjelltas. Deri më sot siç e dimë, ky shërbim është falas dhe mendohet se përfshihet në kontratën e menaxhimit të aeroportit, por tashmë kjo do t’u faturohet klientëve dhe pasagjerëve që hyjnë apo dalin në Shqipëri përmes Rinasit.

Në mbledhjen e fundit të kryesisë së Partisë Socialiste u verifikuan dy zhvillime që kaluan për u raportuar në media. 

Së pari ishte debati mes kryetarit të saj Edi Rama me ish-ministrin e Jashtëm Ditmir Bushati për çështjen e votimeve të 30 qershorit. Kryeministri është ankuar për pjesëmarrjen e ulët në Tiranë dhe në Shkodër por ky qëndrim është lexuar nga Bushati si goditje për të.