Blloku Bota

Greqia është shtylla e strategjisë amerikane në rajonin e Ballkanit. Këtë pohon në një intervistë për gazetën greke “Kathimerini”, ambasadori amerikan në Athinë, Geoffrey Pyatt.

Ndërroi jetë në moshën 77-vjeçare Stanislav Petrov, ish-oficeri i ushtrisë sovjetike, i cili shmangu katastrofën botërore gjatë Luftës së Ftohtë. Në vitin 1983, në kohën kur ishte në detyrë, në qendrën ruse të paralajmërimit të kërcënimit bërthamor, kompjuterat treguan gabimisht raketa që vinin nga Shtetet e Bashkuara. Petrov nuk e dha alarmin e një sulmi ndaj Rusisë, pasi kuptoi se ishte një alarm i rremë, duke shmangur luftën bërthamore mes SHBA-ve dhe Rusisë. Stanislav Petrov ndërroi jetë në shtëpinë e tij në Moskë, në muajin maj, por vdekja e tij nuk ishte bërë publike.

Në fjalimin e tij të parë para Asamblesë së Kombeve të Bashkuara presidenti amerikan Donald Trump paralajmëroi se Shtetet e Bashkuara do të jenë të detyruar të përdorin forcën për të "shkatërruar" krejtësisht Korenë e Veriut nëse Pheniani nuk tërhiqet nga programin  bërthamor.

Rreth 152 milionë fëmijë në botë, apo 1 në çdo 10 fëmijë janë të përfshirë në punë. Po kështu 72 525 000 bëjnë punë të rrezikshme, më shumë se 1/3 nuk shkojnë në shkollë. Shifrat janë publikuar nga një raport i Organizatës Ndërkombëtare të Punës, agjenci e OKB-së. Në krahasim me vitin 2000 numri i fëmijëve të përfshirë në punë ka rënë me 94 milioë, por ritmi i rënies është ngadalësuar. Fëmijët janë të moshës 5-17 vjeç ndërkohë që për vitin 2016, llogaritet se 40 milionë njerëz janë viktima të skllavërisë moderne dhe 89 milionë përjetuan forma të saj.

Ambasadori francez në Kosovë Didier Chabert ka deklaruar në një intervistë për gazetën “Zëri” se Franca mbështet krijimin e një force të armatosur të Kosovës, nisur nga fakti se kemi të bëjmë me një vend Sovran. Por sipas tij, do të duhet që procesi të ndërmerret në kohën e duhur “duke marrë parasysh ndjeshmërinë e gjithë kosovarëve, në mënyrë që kjo forcë të jetë vërtet shumetnike dhe e pranuar nga të gjitha pjesët e shoqërisë”.

Sekretari amerikan i Mbrojtjes, James Mattis ka deklaruar këtë fillim jave se për çështjen koreane, SHBA kanë në tryezë një opsion ushtarak. Ai ka refuzuar të japë hollësi, por ka bërë të qartë se plani synon të kufizojë dëmet që mund t’i shkaktohen Koresë së Jugut, aleat strategjik i SHBA dhe nën rrezen e artilierisë koreanoveriore. Mattis është përpjekur të shmangë perceptimet e marra nga ddeklarimet e para dsisa javëve të presidentit Trump që foli për “zjarr dhe tërbim”.

ShBA dhe Izraeli kanë hedhur një tjetër hap në drejtim të thellimit të marrëdhënieve të tyre, edhe kështu strategjike dhe shumë të ngushta. Ushtria izraelite informon për hapjen në Izrael të një baze ushtarae permanente amerikane, e cila do të inkuadrohet në një bazë ajrore izraelite në jug të vendit.

Oligarkë dhe miliarderë ruse si dhe anëtarë të elitës ukrainase të akuzuar për korrupsion janë ndër qindra personat  që kanë marrë pasaporta evropiane nëpërmjet asaj që quhet "viza e artë", sipas një artikulli të Guardian. Qeveria qipriote ka fituar më shumë se 4 miliardë euro që nga viti 2013, duke duke u dhënë atyre të drejtën për të jetuar dhe punuar në të gjithë Bashkimin Evropian në këmbim të investimeve në Qipro.

Kina dhe Rusia filluan një stërvitje ushtarake të përbashkët në një zonë detare pranë Koresë së Veriut në një kohë kur situata në rajon është shumë më e tensionuar, përkundër sfidave të ambicjeve bërthamore të shtetit komunist. 

Diçka misterioze po ndodh me diplomatët amerikanë në Havana të Kubës. Associated Pres shkruan së fundmi për hetimet që po kryhen nga pala amerikane rreth shkaqeve të simptomave që kanë prekur deri më tani 21 pjesëtarë të trupit diplomatik të SHBA në Kubë. Mjekët, shkencëtarët dhe analistët e shërbimeve sekrete nuk kanë qenë në gjendje të japin shpjegim se çfarë po ndodh ndonëse teoritë e tyre përfshijë armët elektromagnetike, pajisje përgjuese apo edhe një sulm zanor.