Blloku Bota

Presidenti rus Vladimir Putin ka deklaruar se për sa kohë do jetë ai në Kremlin, martesa gay nuk do të legalizohet.

Po e përsëris: për sa kohë jam unë president kjo nuk do të ndodhë. Ka për të vazhduar me babi dhe mami

është shprehur Putin gjatë një mbledhjeje me komisionin shtetëror për ndryshimin e Kushtetutës.

Mediat po ashtu raportojnë se po diskutohet që në Kushtetutën e re të përfshihet norma e moslëshimit të territoreve, një përcaktim që thuhet se synon të bllokojë a priori kërkesat e Japonisë dhe Ukrainës. 

Një tjetër vend ka njohur atë që quhet si Genocidi Armen. Parlamenti sirian ka marrë vendimin e njohjes së përkufizimit të një ngjarjeje historike sipas së cilës Perandoria Osmane është përgjegjëse për vdekjen e 1.5 milionë armenëve në vitet 1915-1917. 

Parlamenti dënon dhe njeh genocidin e kryer ndaj armenëve nga otomanët në fillim të shekullit të 20-të

thuhet në deklaratën e Parlamentit sirian.

Mediat serbe, të deklaruara edhe si liberale, po shkruajnë këto kohë gjerësiht për situatën në Mal të Zi. Kanë lënë Kosovën pak mënjanë, e kanë harruar si pa dashje Serbinë e Vjetër, për t’i kushtuar vëmendje Serbisë Bregdetare siç ndoshta imagjinojnë se është Mali i Zi. Ligji për lirinë fetare, miratuar së fundmi, ka vënë në lëvizje Beogradin zyrtar që sheh te të drejtat e Kishës Orthodhokse Serbe mundësi të ushtrimit të interesave të veta.

 Agjencia ruse e lajmeve, Sputnik, e njohur si zëdhënëse e politikave të Kremlinit, i ka lënë një vend në faqen e saj qëndrimeve të një ish-oficeri të Mossadit, ekspert i çështjeve iraniane, Eliezer Tsafrir, dikur shef i stacionit iranian të shërbimit izraelit. 

Ish-ministri grek i Mbrojtjes në qeverinë e Alexis Tsipras, Panos Kammenos ka deklaruar në një intervistë të dhënë së fundmi për televizionin ANT1 se mes Gjermanisë dhe Greqisë pati një akord për daljen e kësaj të fundit nga Bashkimi Europian.

Varoufakis ra dakord me Schaueble që të merrte 80 miliardë euro dhe linte Eurozonën. Ai ndoqi linjën e Schauble

ka thënë Kammenos.

Autoritetet malazeze kanë ndaluar hyrjen e një delegacioni ushtarak serb të drejtuar nga ministri i Mbrojtjes, Alexander Vulin.  Delegacioni ishte me veshje ushtarake dhe mendohej të vendoste një kurorë në Kolasin, pranë monumentit të Pavle Bulatoviç.

Mediat raportojnë se autoritetet kishin dhënë lejen fillimisht, por mandej i komunikuan ambasadorit serb në Podgoricë, Vladimir Bozoviç, se leja nuk ishte më e vlefshme.

Turqia e Recep Tayyip Erdogan është duke kërkuar rrugët e një marrëveshjeje detare e Izraelin. Në një opinion publikuar në qendrën studimore izraelite, Besa Center, kolumnisti Burak Bekdil shkruan se memorandumi me Libinë është një model të cilin Ankaraja po synon ta aplikojë edhe me TelAvivin. 

Burime të ndryshme mediatike raportojnë se SHBA ka nisur tërheqjen e trupave nga Iraku. Mediat citojnë deputetin iraken, Ali al-Ghanimi sipas të cilit trupat amerikane do të lënë 15 bazat e tyre në Irak. Al-Ghanimi ka sqaruar se trupat amerikane do të kufizohen në vetëm dy baza, njëra pranë qytetit Erbil në veri dhe tjetra në Anbar që ndodhet rreth 180 km në perëndim të Bagdadit.

Ish-këshilltarja Speciale e Federica Mogherinit bën sot thirrje për ndërhyrje ushtarake të Europës në Libi. Përmes një shkrimi të publikuar në “Politico”, Nathalie Toçi, aktualisht drejtorer e Istituto Affari Internazionali, apelon për një rol të ri të Europës në një zonë që sipas saj është e ndërlidhur historikisht me kontinentin.

Teksa pranon se sjellja e BE-së në arenën ndërkombëtare është e zhvlerësuar nga moskonsiderimi i vazhdueshëm i zgjidhjeve apo dimensionit ushtarak të politikës.

Turqia zyrtare është pozicionuar hapur kundër të ashtuquajturit Marrëveshje të Shekullit e që është plani I propozuar nga presidenti amerikane, Donald Trump për paqen izraelito-palestineze. Presidenti turk, Recep Tayyip Erdoğan ka deklaruar përmes një fjale të dedikuar për konferencën ndërparlamentare për Platformën e Jeruzalemit në Kuala Lumpur se Ankaraja zyrtare nuk do të lejojë në asnjë mënyrë që paqja në rajon të vihet në pikëpyetje nga lëvizje të këtilla.