Blloku Bota

Një në pesë njerëz në Afrikë vuan nga kequshqyerja. 93 milionë njerëz në 36 vende janë pa ushqim në kuptimin e drejtpërdrejtë të shprehjes. Sipas një raporti të Oxfam, më të prekurit janë gratë dhe fëmijët.

Në rajonin sub-Saharian, një fëmijë vdes nga uria çdo 30 sekonda, ndërsa 2 në 5 gra (në moshë riprodhuese) vuajnë nga anemia për shkak të mungesës së ushqimit, shton Oxfam, e cila saktëson se çmimet e ushqimeve në të gjithë kontinentin kanë arritur shifra rekord.

Organi drejtues i Dhomës së Deputetëve Spanjollë (i ashtuquajturi 'Mesa del Congreso') ka pranuar kërkesën e tre palëve për të krijuar një komision hetimor për rastet e mundshme të abuzimit të fëmijëve të kryera brenda Kishës Katolike. Ky është hapi i parë drejt analizimit, diskutimit dhe votimit të kërkesës nga parlamentarët.

Kërkesa u bë nga Podemos, një nga dy anëtarët e koalicionit qeverisës të qendrës së majtë, dhe nga dy parti të Katalonjës dhe Vendeve Baske (Esquerra Republicana dhe Eh Bildu).

Kompanitë e mëdha të teknologjisë, platformat online të të cilave kanë reklama që rezultojnë mashtrime duhet të rimbursojnë viktimat. Në Britani, deputetët po e kërkojnë nga qeveria një marrëveshje të tillë me kompanitë e mëdha.

Një e tillë ekziston me bankat, të cilat janë angazhuar për të rimbursuar viktimat e mashtrimit bankar, por nuk ka ende një rregullore për mediat sociale dhe faqet e tjera të internetit, ku shpesh hidhet edhe hapi i parë i mashtrimit.

Kompania mëmë e Facebook, Meta Platforms, Inc, është në fazat e fundit të bisedimeve për krijimin e një filiali grek, nën ombrellën e së cilës mund të transferohen aktivitetet ndërkombëtare që aktualisht po zbatohen në vende të tjera.

Siç raporton grekja “Kathimerini”, po diskutohet edhe mbi blerjen e Accusonus, Inc, një kompani start-up greke që zhvillon softuer për prodhimin/performancën muzikore dhe riparimin e audios.

Michael Carpenter, ambasador i Shteteve të Bashkuara në Organizatën për Siguri dhe Bashkëpunim në Evropë (OSBE), thotë se propozimet për sigurinë evropiane, që Rusia ia dërgoi Perëndimit para pak ditësh, janë një rrugë drejt një rendi të ri botëror të rrezikshëm.

Duke folur për radion “Evropa e Lirë”, Carpenter thotë se parimet kyçe, si sovraniteti dhe integriteti territorial i shteteve, janë të panegociueshme.

Kryeministri socialist, Antonio Costa, fitoi zgjedhjet e parakohshme në Portugali, me një shumicë që ia bën të panevojshëm koalicionin.

Këto zgjedhje treguan rritjen e fortë të ekstremit të djathtë. Megjithatë socialistët siguruan 117 nga 230 vende në Parlament.

Megjithëse rezultatet e tregonin kokë më kokë me opozitën e djathtë, Costa ia doli të përmirësojë rezultatet e vitit 2019 dhe nuk do të ketë nevojë për aleatët e së majtës radikale, të cilët i kërkuan këto zgjedhje, duke mos votuar buxhetin e vitit 2022.

Lufta në Ukrainë po trumbetohet si eventualitet emergjent në Europë aq sa presidenti amerikan Joe Biden foli për një sulm rus në muajin shkurt. Mirëpo ajo që disa media në Perëndim po vënë në dukje është fakti se Kievi zyrtar po e përcjell me qetësi këtë situatë duke shprehur madje mosdakordësi të mëdha për mënyrën sesi po menaxhohet kriza nga SHBA. Përveç presidentit Volodymyr Zelenskiy, një sërë zyrtarësh të lartë ukranias po flasin me një gjuhë krejt tjetër nga ajo që cilësohet si histeria mediatike e një lufte në Ukrainë.

Rreth 50 mijë shoferë kamionësh në Kanada u mobilizuan në një protestë që mbahet në Otava kundër vaksinimit të detyrueshëm. Kolona e kamionëve arriti gjatësinë 64 kilometra, ndërkohë kryeministri kanadez, Justin Trudeau, la shtëpinë e tij në Otava me familjen e tij dhe u zhvendos në një vend sekret.

Politika italiane ka provuar edhe njëherë se shkëlqen vetëm kur dështon. Sergio Mattarella është rizgjedhur president i Republikës pas dështimit nga Parlamenti për të gjetur një pasues të tij. Për pasoja drejtuesit e partive nuk kanë patur opsion tjetër veç t’i luten Mattarellës të pranojë rizgjedhjen të cilën e kishte refuzur. 

Tetë raunde u deshën që politika italiane të varet te Mattarella të cilin e duartrokiti pas numërimit të votës së 505-të dhe që sot përfaqëson njeriun anti-krizë në republikën e krizave.

Vdekja e një fotografi të njohur në Francë ka hapur polemika. Zvicerani René Robert u rrëzua në një nga rrugët më të frekuentuara të Parisit dhe mbeti aty i shtrirë për nëntë orë me radhë pasi askush nuk i erdhi në ndihmë. Robert vdiq nga hipotermia dhe jo nga trauma pas rënies. Por për ta thënë me fjalët e mikut të tij më të mirë, ai vdiq nga indiferenca.