Shqipëri-Serbi: Negociata për të fiksuar detajet e fundit të axhendës së vizitës së Ramës në Beograd

Tre ditë para vizitës së Kryeministrit Rama në Beograd, Serbia dhe Shqipëria përfshihen në negociata  për të fiksuar detajet e fundit të axhendes. Palët po negociojnë axhendën, e cila është miratuar paraprakisht. Bëhet e ditur se qeveria shqiptare nuk ka pranuar asnjë devijim apo ndryshim të axhendës së paraqitur e për të cilën është rënë dakord para incidentit në ndeshjen e 14 tetorit në Beograd mes kombëtareve të futbollit të dy vendeve. Vizita që ishte programuar më 22 dhe 23 tetor, u shty për shkak të ngjarjeve në atë ndeshje. Komisionet teknike të dy Ministrive të Jashtme, megjithatë po zhvillojnë negociata intensive, pasi pretendimi i palës serbe është devijimi i udhëtimit në Luginën e Preshevës, gjë e cila për palën shqiptare është e papranueshme dhe e panegociueshme. I vetmi ndryshim nga axhenda mund të jetë anulimi i takimit mes Presidentit Nikoliç me kryeministrin Rama, pasi kreu i shtetit serb mund të jetë në një vizitë zyrtare jashtë Serbisë. Ndërkohë, vizita bëhet në një ditë kur Serbia ka festë zyrtare, fakt i cili për zyrtarët shqiptarë të Preshevës është bërë me qëllim nga pala serbe. Zyrtarisht edhe qeveria shqiptare konfirmon se deri më tani nuk ka asnjë devijim nga axhenda.

L.V