Nis mbrojtja e Ilir Beqjas. Nënkryetari i Grupit Parlamentar të PS-së, Balla: “Po e sulmojnë grosistët e ilaçeve që sponsorizojnë PD”. Nuk jep asnjë emër konkret...

Nënkryetari i Grupit Parlamentar të Partisë Socialiste, Taulant Balla, ka dalë sot me një qëndrim politik rreth asaj që ai e quajti sulm dhe fushatë ndaj ministrit të Shëndetësisë. Sipas Ballës, ky sulm koordinohet me selinë e PD-së përmes grosistëve të ilaçeve, meqenëse sipas tij, ministri ka çuar në uljen e çmimit të barnave. “Do të doja të përdorja disa minuta nga fjala ime për të denoncuar një sulm të mirëkoordinuar nga SHQUP-i përkundrejt ministrit të Shëndetësisë së vendit tim. E them është sulm i mirëkoordinuar nga SHQUP-i, sepse faktet që do të sjell sot, janë fakte që tregojnë qartë pse SHQUP-i është shqetësuar shumë nga ulja e çmimit të barnave në Shqipëri. Prej 1 janarit, në Shqipëri çmimet e barnave janë shumë më të ulëta seç ishin më parë, mesatarja është rreth 30 %. Rastet që solli ministri dhe që do t’i sjellë edhe unë në vëmendjen tuaj, shkojnë në uljen e çmimit të barnave edhe në 200% apo 300%. Po pse SHQUP-i është kaq i shqetësuar që edhe deputetë të bashkërendojnë sulmin me kompanitë grosiste kundër ministrit të Shëndetësisë? Kam këtu listën e kompanive grosiste, nuk po ja them emrin se janë shumë, të cilat janë të regjistruara qoftë në Drejtorinë e Kontrollit të Barnave, qoftë në Ministrinë e Shëndetësisë, qoftë në dogana. Kam këtu edhe listën e sponsorëve të Partisë Demokratike në zgjedhjet e 23 qershorit! Si ka mundësi që janë njësoj?! Si grosistët e ilaçeve ashtu dhe sponsorizuesit e PD-së në fushatën e 2013! Të njëjtët persona të regjistruar si grosistë ilaçesh, janë të regjistruar dhe si sponsorë të PD-së në zgjedhje”, tha Balla. Ai nuk ka pranuar të bëjë publike kompanitë që po godasin ministrin Ilir Beqja, me arsyetimin “se janë shumë”. Emrat e këtyre sponsorizuesve do të kthenin akuzën në denoncim publik, i cili përndryshe, pa emra, quhet shantazh dhe presion. Për analpgji, Jamarbër Malltezi ka ditë që del e thotë se kryeministri favorizon një sponsor të tij, pro nuk thotë kush është ky sponsor. Për më tepër, që në rastin e Beqjas, çështja më e nxehtë ka qenë testimi, për të cilin protestuan mjekët, por edhe koncesionet miliardëshe, për të cilat ministri nuk ka dhënë sqarime shteruese.
s.z