PDIU: Rezoluta çame e vitit 2004 hyn në fuqi brenda pak ditësh

PDIU ka reaguar në lidhje me publikimin në Fletoren Zyrtare të rezolutës për çështjen çame, që në përfundim të një hetimi parlamentar, rezultoi e miratuar në një votim që në vitin 2004.

Kjo parti thotë se teksti i kësaj rezolutë ka shumë ngjashmëri me projekt-rezolutën e parashtuar prej tyre në Komisionin e Jashtëm Parlamentar. Sipas PDIU-së, votimi i kësaj rezolute është konfirmuar edhe nga vetë kryetarja e Kuvendit, Jozefina Topalli.

Pas këtij hapi, thotë PDIU, asnjë qeveri nuk mund të lërë më pas dore çështjen e të drejtave të çamëve dhe duhet të respektojnë vullnetin e parlamentit.

Rezoluta për cështjen çame e vitit 2004 u paraqit për votim në Kuvend në atë kohë nga deputetë të Partisë së Ballit Kombëtar. Në përfundim të votimit, rezoluta mori 53 vota pro, 55 abstenime dhe 4 vota kundër të PBDNJ-së.

Rezoluta shprehimisht “i kërkon qeverisë së Republikës së Shqipërisë të shtojë më tej përpjekjet për zgjidhjen e çështjes së pronave dhe pasurive të tjera të patjetërsueshme të popullsisë çame, në përputhje me dokumentet e njohura ndërkombëtare; Çmon se gjetja e një zgjidhjeje të shpejtë në aspektin teknik dhe juridik midis qeverive të dy vendeve për çështjen e sekuestros konservative të vendosur si rrjedhojë e Ligjit të Luftës të vitit 1940 mbi pasuritë e popullsisë çame, si dhe ngrirjen e ligjit Nr. 2664 të 3 dhjetorit të vitit 1998, do të përbënin një kontribut shumë të rëndësishëm për kapërcimin e problemeve të krijuara prej tyre”.

SHQIP